အလင်း၊ မေလ ၁၄ ရက်၊ တီးတိန်
ချင်းပြည်နယ် တီးတိန်မြို့သိမ်းတိုက်ပွဲ သတင်းကြောင့် ဆေးရုံအုပ်အပါအဝင် ဆရာဝန်တွေ ကြိုတင်ထွက်ပြေးတိမ်းရှောင်နေကြတာကြောင့် လူနာတွေဟာ ဆေးကုသဖို့ အခက်တွေ့နေကြတယ်လို့ ဒေသခံတွေက ရွှေဖီမြေကို ပြောပါတယ်။
ကုတင် ၁၀၀ ဆံ့ တီးတိန်မြို့ဆေးရုံရှိ ဆရာဝန်၊ ကျန်းမာရေးဝန်ထမ်းတွေဟာ မြို့သိမ်းတိုက်ပွဲသတင်းကြောင့် ပြီးခဲ့တဲ့ ဧပြီလ နောက်ဆုံးအပတ်ကစပြီး နယ်စပ်ဘက် ကြိုတင်တိမ်းရှောင်ကြတာပဲ ဖြစ်ပါတယ်။
“ဆေးရုံမှာ ဆရာဝန်တွေ မရှိတော့ဘူး။ မြို့သိမ်းတိုက်ပွဲ ဖော်ဆောင်မယ်ဆိုပြီး သတင်းတွေ ထွက်လာပြီးနောက်ပိုင်း နယ်စပ်ဘက်ကို အကုန်ထွက်ပြေးနေကြတယ်။ ကျန်းမာရေးဝန်ထမ်းတွေပါမကျန် နယ်စပ်ဘက်ကို အားလုံးသွားကြကုန်တာလေ” လို့ တီးတိန်မြို့ခံတစ်ဦးက ပြောပါတယ်။
လက်ရှိ တီးတိန်ဆေးရုံမှာ ကုသမှု ခံယူနေကြတဲ့ လူနာတွေဟာ ဆရာဝန်တွေ၊ ကျန်းမာရေးဝန်ထမ်းတွေ မရှိတာကြောင့် ဆေးကုသဖို့ အခက်တွေ့နေကြရပါတယ်။
“ဆေးရုံမှာ လူနာတွေပဲ ကျန်ခဲ့တယ်။ လူနာတွေ များတယ်။ ကျန်းမာရေးဝန်ထမ်းတွေ မရှိဘူး ဖြစ်နေတယ်။ ကလေးဘက် ဆေး သွားကုဖို့ဆိုလည်း ကုန်ကျစရိတ် များတယ်။ နယ်စပ်ဘက်လည်း သွားမကုနိုင်ဘူး” လို့ တီးတိန်မြို့ခံတစ်ဦးက ရွှေဖီမြေသို့ ပြောပါတယ်။
တီးတိန်မှာ မြို့သိမ်းတိုက်ပွဲသတင်းကြောင့် ဌာနဆိုင်ရာဝန်ထမ်းအပါအဝင် မြို့ခံ ထက်ဝက်ကျော်ဟာ မြန်မာ-အိန္ဒိယနယ်စပ်နဲ့ စစ်ကိုင်းတိုင်း ကလေးမြို့နယ်ဘက် ကြိုတင်ထွက်ပြေးတိမ်းရှောင်နေကြပါတယ်။
လက်ရှိ တီးတိန်မြို့မှာ တိုက်ပွဲ မရှိပေမဲ့ ကလေးမြို့ကနေ စစ်တပ်က အင်အား ၆၀၀ ခန့် ထပ်မံ ဝင်ရောက်လာပြီး မြို့ထဲ စစ်ကောင်စီတပ်ဖွဲ့ဝင်တွေ ခြေရှုပ်နေကြသလို မြို့တွင်း လမ်းတွေမှာလည်း လူသူကင်းမဲ့နေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
