ရွှေဖီမြေ၊ မေလ ၂၀ ရက်၊ ကွတ်ခိုင်
တအာင်းတပ်- TNLA ထိန်းချုပ်ခဲ့တဲ့ ရှမ်းမြောက် ကွတ်ခိုင်မြို့နယ်ကို ကိုးကန့်တပ်- MNDAA က တိုက်ခိုက်ချိန် ပျက်စီးသွားတဲ့ ဒေသခံတွေရဲ့ နေအိမ်တွေကို လျော်ကြေး ပေးမယ်လို့ ပြောဆိုထားပေမဲ့ လာပေးတာ မရှိသေးဘူးလို့ ဒေသခံတွေက ပြောပါတယ်။
ကွတ်ခိုင်မြို့နယ်ကို ကိုးကန့်တပ်က ထိန်းချုပ်ပြီးနောက် ပျက်စီးသွားတဲ့ နေအိမ်တွေရဲ့စာရင်းကို လာရောက်ကောက်ခံပြီး လျော်ကြေး ပေးမယ်လို့ ပြောဆိုထားပေမဲ့ နှစ်လကျော် ကြာတဲ့အထိ လာပေးတာ မရှိဘူးလို့ ဆိုပါတယ်။
“အခုအိမ်ကို ကိုယ်ထူကိုယ်ထနဲ့ပဲ ပြန်ပြင်ရတယ်။ ပျက်ကတည်းက စာရင်းလာကောက်တာ။ အခုထိ ဘာမှမကြားရတော့ဘူး။ ပျက်စီးသွားတဲ့အထဲမှာ ကျနော့်အိမ်လည်း ပါတယ်” လို့ ကွတ်ခိုင်မြို့နယ်ခံ အမျိုးသားတစ်ဦးက ရွှေဖီမြေကို ပြောပါတယ်။
ရွှေဖီမြေက ရရှိထားတဲ့ စာရင်းတွေအရ ဒရုန်းဗုံးကြောင့် မန်လွယ်၊ ဟိုကျန့်၊ လွယ်ဆိုင်၊ မန်ထန် ကျေးရွာက နေအိမ် ၁၅ လုံး၊ ဘုန်းကြီးကျောင်း ၃ ကျောင်းနဲ့ စာသင်ကျောင်းတစ်ကျောင်း ပျက်စီးခဲ့ပါတယ်။
“အဓိက ပျက်စီးတာက လွယ်ဆိုင်ရွာဘက်မှာ ဖြစ်တာ။ လျော်ကြေး ပေးမယ်လို့တော့ ပြောတာပဲ။ အခုထိ ဘာမှမကြားသေးဘူး”
ပြီးခဲ့တဲ့ မတ်လ ၁၄ ရက်မှာ MNDAA က ကွတ်ခိုင်မြို့နယ်ရှိ TNLA ရဲ့ တပ်စခန်းတွေကို တိုက်ခိုက်သိမ်းပိုက်ခဲ့ပြီး ကွတ်ခိုင်မြို့ကို ထိန်းချုပ်ကာ အထူးဒေသ ၁ အဖြစ် အုပ်ချုပ်နေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
