ပို့လဘား၊ မေလ ၂၈ ရက်၊ မူဆယ်
ရှမ်းမြောက် တရုတ်-မြန်မာနယ်စပ် မူဆယ်မြို့မှာ စစ်ကောင်စီတပ်က ကျားဖျန်တွေကို လိုက်လံ ဖမ်းဆီးနေတယ်လို့ မူဆယ်မြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
ဒီနေ့ မေလ ၂၈ ရက် နေ့လယ်ပိုင်းမှာ မူဆယ်မြို့ မန့်ဝိန်း ၂ လမ်းဘက်မှာရှိတဲ့ ကျားဖျန်ကုမ္ပဏီတစ်ခုကို စစ်တပ်က လာရောက်ဝန်းရံပြီး ကျားဖျန်လုပ်ကိုင်သူတွေကို ဖမ်းဆီးခဲ့တယ်လို့ ပြောပါတယ်။
မူဆယ်ဒေသခံ အမျိုးသားတစ်ဦးက “မန့်ဝိန်း ၂ လမ်းဘက်မှာ ကားတွေ အများကြီးနဲ့ လာဝိုင်းထားတာ။ သူတို့ကျားဖျန်တွေ လာဖမ်းတာ။ ဘယ်လောက် ဖမ်းလဲတော့ မသိရသေးဘူး။ ကားတစ်စီးအပြည့်နဲ့ ဖမ်းဆီးခေါ်သွားတာပဲ သိရတယ်။ အရင်က သူတို့လာဖမ်းမယ်ဆိုရင် အရင်အကြောင်းကြားပြီးမှ လာဖမ်းတာ။ ဒီနေ့ကျ သူတို့ဘာမှမပြောဘဲ လာဖမ်းသွားတာဆိုတော့ သတင်းထွက်ပေါ်မှာ သူတို့ကြောက်လို့ထင်တယ်” လို့ ပြောပါတယ်။
မူဆယ်မှာ လိုင်းကြေး ပေးပြီး ဖွင့်လှစ်နေတဲ့ ကျားဖျန်ရုံ အွန်လိုင်းငွေလိမ်ဂိုဏ်းတွေ အများစု ဆက်ရှိနေပြီး အဲဒီအထဲမှာ ဒေသအာဏာပိုင်တွေ ရှယ်ယာနဲ့ ဖွင့်လှစ်တာတွေလည်း ရှိကြောင်း သိရပါတယ်။
ပြီးခဲ့တဲ့ မေလ ၂၁ ရက် ည ၁၀ နာရီဝန်းကျင်မှာလည်း မူဆယ်မြို့ ၄၅ ကုန်းရပ်ကွက်ဘက် ကျားဖျန် ဖမ်းရာကနေ ပြည်သူ့စစ်အချင်းချင်း ပစ်ခတ်မှု ဖြစ်ပွားတဲ့ဖြစ်စဉ်လည်း ရှိခဲ့ပါတယ်။
စစ်တပ်က ပြီးခဲ့တဲ့ မေလ ၁၇ ရက်က မူဆယ်မြို့ စွမ်စော်ရပ်ကွက်ရှိ ကျားဖျန်ရုံတစ်ခုကို ဝင်ရောက်စီးနင်းခဲ့ရာ တရုတ်နိုင်ငံသား ၄ ဦးအပါအဝင် မြန်မာနိုင်ငံသား ၃၈ ဦး ဖမ်းဆီးရမိခဲ့ကြောင်း ထုတ်ပြန်ချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
