စိန်၊ ဇွန်လ ၂၁ ရက်၊ ဖားကန့်
ကချင်ပြည် ဖားကန့်မြို့မှာ မိုးအဆက်မပြတ်ရွာသွန်းမှုကြောင့် ရေကြီးရေလျှံဖြစ်ပြီး နေအိမ်တချို့ နစ်မြုပ်နေတယ်လို့ ဖားကန့်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
ဖားကန့်မြို့ နန့်ရင်ချောင်း၊ နန့်ကောင်းချောင်း၊ ဥရုချောင်းရေတွေဟာ စိုးရိမ်ရေမှတ်ထက် ကျော်လွန်နေအောင် ရေတက်နေတာကြောင့် ရပ်ကွက်အများစုမှာ ရေကြီးနေတာလို့ ဆိုပါတယ်။
“ရေက ဆက်တိုက်တက်နေတာ။ ရေဘေးသင့်သူတွေလည်း များတယ်။ တချို့အိမ်ဆို မြုပ်တဲ့အထိ ဖြစ်တာမျိုးတွေ အထိပါ။ မိုးက ဆက်တိုက်ရွာနေတော့ ရေကဘယ်လိုမှ မကျနိုင်ဘူး”
ပြီးခဲ့တဲ့ ဇွန်လ ၁၄ ရက်ကစပြီး ဖားကန့်က ငှက်ပျောတောနဲ့ အေးမြသာယာရပ်ကွက်တွေမှာ ရေစတင်ကြီးနေပြီး မနေ့ ဇွန်လ ၂၀ အထိ ရေဆက်လက်တက်နေတာကြောင့် ရေဘေးသင့်ဒေသခံတွေ ရာနဲ့ချီရှိနေတယ်လို့ အထက်ပါ အမျိုးသားက ပြောပါတယ်။
“ကယ်ဆယ်ရေးအသင်းတွေဘက်ကလည်း သက်ကြီးရွယ်အို၊ ကလေးနဲ့ ကိုယ်ဝန်ဆောင်၊ နာမကျန်းသူတွေကို ဦးစားပေးပြီး အအတတ်နိုင်ဆုံး ရွှေ့ပြောင်းပေးနေကြတာ တွေ့ရပါတယ်”လို့ နောက်ထပ်ဒေသခံတစ်ဦးက ပြောပါတယ်။
ဒါ့အပြင် မိုးကောင်းမြို့မှာလည်း ရေကြီးရေလျှံတာကြောင့် ဒေသခံသောင်းနဲ့ချီ ရေဘေးသင့်နေပြီ အကူအညီတွေလည်း လိုအပ်နေသေးတယ်လို့ ပြောပါတယ်။
မိုးဆက်တိုက်ရွာသွန်းပြီး ရေတွေဆက်လက်တက်နေဆဲဖြစ်တာကြောင့် ရေကြီးမှုဖြစ်နေတဲ့ ရပ်ကွက်နေအိမ်နဲ့ ချောင်းဘေးတွေမှာ နေထိုင်ကြတဲ့ ကျန်ရှိနေသေးတဲ့ ဒေသခံတွေအနေနဲ့က ပြောင်းရွှေ့နေထိုင်ကြဖို့ လိုအပ်တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
