ရွှေဖီမြေ၊ ဧပြီ ၃ ရက်၊ လားရှိုး
စစ်ကောင်စီတပ် ထိန်းချုပ်နေတဲ့ ရှမ်းမြောက် လားရှိုးမြို့မှာ စစ်ဖက်ရေးရာ လုံခြုံရေးတပ်ဖွဲ့ (စရဖ) ကပါဆိုပြီး အွန်လိုင်းပေါ်က ခြိမ်းခြောက်ကာ ငွေကြေးတောင်းခံတာတွေ ကြုံနေရတယ်လို့ လားရှိုးဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ မတ်လ ၁၂ ရက်နေ့ကစပြီး Tiktok အကောင့်တုတစ်ခုကနေ ငွေညှစ်တောင်းခံခဲ့တာဖြစ်ပြီး တောင်းခံတဲ့ ငွေမပေးရင် အသက်အန္တာရာယ်အထိပါ ခြိမ်းခြောက်သွားတာလို့ ကိုယ်တိုင်ကြုံတွေ့ခဲ့ရသူ လားရှိုးဒေသခံတစ်ဦးက ပြောပါတယ်။
“သူ့ကိုယ်သူလည်း စရဖ အဖွဲ့စည်းကပါ။ ဘာညာနဲ့ လာပြောထားပါတယ်။ သူ့အကောင့် ဘလော့လိုက်တော့ ဖုန်းဆက်လာတယ်။ သူ့အကောင့်ဖြည်ပေးဆိုပြီး ပြောလာတာ။ ကျွန်မအထင်တော့ အဖွဲ့အစည်းနာမည်ကို အလွဲသုံးစားလုပ်တာလားတော့ မသိဘူး”
ဒါ့အပြင် ၎င်းတို့ တောင်းဆိုထားတဲ့ ငွေပမာဏ မပေးနိုင်ရင် အိမ်အထိ လိုက်လာမယ်ဆိုပြီး ခြိမ်းခြောက်သွားကြောင်း အဆိုပါ ကြုံတွေ့ခဲ့ရသူက ဆက်ပြောပါတယ်။
“လားရှိုးမှာက ကျန်တဲ့လူတွေလည်း ခဏခဏကြုံရတယ်ဆိုပြီး ပြောတာကြားရတယ်။ အစသူက ပိုက်ဆံပေးတဲ့။ မပေးရင် ကျွန်မပုံတွေ အကြောင်းတွေ လိုင်းပေါ်တင်မယ်တဲ့။ ကျွန်မလည်း ဘာမှ မလုပ်ထားတော့ တင်လိုက်လေလို့။ ကြိုက်သလိုလုပ် ဆိုပြီးပြောတာ။ ဖုန်းခဏခဏ ဆက်လာတယ်။ နင်တို့ဘဝကို သိန်း ၃၀ နဲ့ တန်ဖိုးဖြတ်ဆိုပြီး ပြောလာတယ်”
လားရှိုးမှာ ပြီးခဲ့တဲ့ ဖေဖော်ဝါရီ ၂၄ ရက် ညနေ ၄ နာရီခွဲမှာလည်း ရပ်ကွက် (၅) ရှိ ကုန်စုံဆိုင်တစ်ခုက အသက် ၂၀ ကျော်အရွယ် အမျိုးသမီးတစ်ဦးကို အမျိုးသား ၃ ဦးက သေနတ်ထောက်ကာ ဖမ်းဆီးခေါ်ဆောင်သွားခဲ့ပြီး သိန်းထောင်ချီနဲ့ ပြန်ပေးဆွဲကာ ငွေညှစ်တောင်းခံခဲ့တဲ့ ဖြစ်စဉ်တွေလည်း ရှိခဲ့ပါတယ်။
ဒါ့အပြင် ပြီးခဲ့တဲ့ နှစ်ပိုင်းတွေမှာလည်း တိုင်းရင်းသား လက်နက်ကိုင်အဖွဲ့တွေရဲ့ နာမည်ကို အသုံးပြုပြီး လားရှိုးမြို့ပေါ်က ဆိုင်တွေထံ ငွေညှစ်တောင်းခံတဲ့ ဖြစ်စဉ်တွေလည်း ရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
