ရွှေဖီမြေ၊ ဇွန်လ ၁၉ ရက်၊ မိုင်းငေါ့
တအာင်းတပ် – PLSF/TNLA ထိန်းချုပ်ထားတဲ့ ရှမ်းမြောက် မိုင်းငေါ့မြို့မှာ ဒေသခံတွေရဲ့ လယ်ယာစိုက်ပျိုးချိန် ရောက်ရှိလာတာကြောင့် လယ်ယာထဲ ရေသွင်းနိုင်းဖို့ ရေဦးထွက်ရာ ဆည်အထက်မှာရှိတဲ့ ရွှေတူးဖော်မှုလုပ်ငန်းတွေကို ရပ်နားထားတယ်လို့ မိုင်းငေါ့မြို့ အုပ်ချုပ်ရေးနဲ့ နီးစပ်သူတစ်ဦးက ရွှေဖီမြေကို ပြောပါတယ်။
“ကျနော်တို့ဖက်က မိုင်းငေါ့မြို့မှာဆိုရင် ဥပမာ ချောင်းရဲ့အထက် သူတို့ ရေသုံးရမယ့်နေရာတွေမှာဆိုရင် ကျနော်တို့ ပိတ်ပေးတဲ့ အနေအထားမှာ ရှိပါတယ်” လို့ ၎င်းက ဆိုပါတယ်။
ရွှေတူးဖော်မှုတွေကို မပိတ်ခင်မှာ လယ်သမားတွေနဲ့ ရပ်ကွက်၊ ရပ်ရွာအုပ်ချုပ်ရေးမှူးတွေနဲ့ တွေ့ဆုံပြီး ပိတ်လို့ရတဲ့ ရွှေဆိုဒ်တွေကို ပိတ်ထားပြီး မရတဲ့ နေရာတွေကိုတော့ ဆက်လက်လုပ်ခွင့်ပြုထားတယ်လို့ သူက ဆက်ပြီးပြောပါတယ်။
ဆက်လက်ပြီး ၎င်းက “ဆည်အထက်ကဟာတွေကတော့ ပိတ်ဖို့ များတယ်။ ဆည်အောက်ကတချို့က မပိတ်ဘဲ ရေမဆင်းအောင် ရေလှောင်လိုက်တယ်။ ဒါပေမဲ့ အဲရေတွေက လယ်ထဲပြန်ဝင်လို့ ဒေသခံတွေရဲ့ တိုင်ကြားချက်နဲ့ သွားရောက်စစ်ဆေးပြီး ပိတ်လိုက်ရတာတွေလည်း ရှိပါတယ်။” လို့ ဆိုပါတယ်။
ရွှေတူးဖော်မှု ရပ်နားတဲ့နေရာတွေဟာ လယ်ကွက်အထက်မှာရှိတဲ့ ရေချောင်းတွေမှာသာဖြစ်ပြီး အောက်ပိုင်းရှိ မန်ပင့်အပါ လယ်ကွက်တွေထဲက ရွှေဆိုဒ်တချို့ကတော့ ရပ်နားခြင်းမရှိဘူးလို့ အမည်မဖော်လို့တဲ့ နောက်ထပ် ဒေသခံတစ်ဦးက ရွှေဖီမြေကို ပြောပါတယ်။
မိုင်းငေါ့မြို့ အထွေထွေအုပ်ချုပ်ရေးမှူးရုံးကတော့ မိုင်းငေါ့မြို့နယ်အတွင်းက ရွှေလုပ်ကွက် လုပ်ငန်းတွေကို ဇွန်လ ၁ ရက်နေ့ကနေ ဇူလိုင်လ ၁၅ ရက်အထိ ၁ လခွဲတိတိ ရပ်ဆိုင်းထားမယ့်အကြောင်း ထုတ်ပြန်ထားပြီး ထုတ်ပြန်ချက်အတိုင်း မလိုက်နာပါက အရေးယူသွားမယ်လို့လည်း ဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
