ရွှေဖီမြေ၊ ဇွန်လ ၁၉ ရက်၊ မိုးဗြဲ
ရှမ်းတောင်-ကရင်နီနယ်စပ် ဖယ်ခုံမြို့နယ် မိုးဗြဲမြို့အနီးမှာ စစ်ကောင်စီနဲ့ ကရင်နီ တော်လှန်ရေးတပ်တွေအကြား တိုက်ပွဲဖြစ်ပွားနေပြီး စစ်တပ်ဘက်က ဗုံးကြဲတိုက်ခိုက်နေတယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
မိုးဗြဲမြို့အနီးမှာ စစ်ကောင်စီနဲ့ ကရင်နီတော်လှန်ရေးတပ်တွေအကြား အပြန်အလှန် ထိုးစစ်ဆင် တိုက်ခိုက်နေပြီး မနေ့က ဇွန်လ ၁၈ ရက် ညနေ ၆ နာရီဝန်းကျင်မှာ စစ်ကောင်စီဘက်က လေယာဉ်နဲ့ ဗုံးကြဲတိုက်ခိုက်မှုတွေ ပြုလုပ်ခဲ့တယ်လို့ ဆိုပါတယ်။
“တိုက်ပွဲက မိုးဗြဲမြို့ပြင်နားမှာ ဖြစ်နေတာ။ မနေ့က တိုက်ပွဲမှာ စစ်ကောင်စီဘက်က အထိနာတယ်လို့ ကြားတယ်။ မနေ့ည ၆ နာရီလောက်မှာ လေယာဉ်နဲ့ လာကြဲသွားသေးတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ မိုးဗြဲမြို့ကို ပြန်လည်ထိန်းချုပ်နိုင်ခဲ့ပေမယ့် မြို့ပြင်နေရာအများစုကိုတော့ ကရင်နီတော်လှန်ရေးတပ်တွေဘက်က ထိန်းချုပ်ထားဆဲဖြစ်တယ်လို့ ၎င်းက ဆက်ပြောပါတယ်။
မိုးဗြဲမြို့ကို စစ်ကောင်စီက ထိန်းချုပ်ပြီးနောက် စစ်ရှောင်တွေကို နေရပ်ပြန်လာဖို့ ခေါ်ယူနေပြီး ပြန်လာတဲ့ စစ်ရှောင်တွေကို နေအိမ်မှာ မနေခိုင်းဘဲ ဘုန်းကြီးကျောင်းမှာသာ နေထိုင်ခိုင်းထားတယ်လို့ ဆိုပါတယ်။
ပြီးခဲ့တဲ့ ၂၀၂၅ ခုနှစ် ဇူလိုင်လမှာ ကရင်နီတပ်ပေါင်းစုတွေ ထိန်းချုပ်ထားတဲ့ မိုးဗြဲမြို့ကို စစ်ကောင်စီဘက်က ပြန်လည်ထိန်းချုပ်နိုင်ခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
