ရွှေဖီမြေ၊ ဇွန်လ ၂၁ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့က ရပ်ကွက်အချို့မှာ ရပ်ကွက်အုပ်ချုပ်ရေးမှူးအသစ် ရွေးကောက်ပွဲ ပြုလုပ်ပြီး စစ်ကောင်စီနဲ့ နီးစပ်သူတွေ အများစု ဝင်ပြိုင်ကြတယ်လို့ မြို့ခံတွေဆီက သိရပါတယ်။
ရပ်ကွက်အုပ်ချုပ်ရေးမှူး ရွေးပွဲကို ဒီနေ့ ဇွန်လ ၂၁ ရက်မှာ လားရှိုးမြို့ပေါ်ရှိ ရပ်ကွက်အချို့မှာ ပြုလုပ်ခဲ့ပြီး တစ်အိမ်လျှင် တစ်ဦး မဲသွားပေးရတယ်လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“စစ်ကောင်စီနဲ့ ပတ်သက်တဲ့သူတွေပဲ ဝင်ပြိုင်ကြတာ။ သူတို့လူဟောင်းတွေရယ်၊ ပြည်သူ့စစ်နဲ့ ပတ်သက်တဲ့သူတွေရယ် ဝင်ပြိုင်ကြတာ။ ဒီနေ့မှာ မဲသွားပေးရတာ” လို့ ဆိုပါတယ်။
ကျန်ရပ်ကွက်တွေကိုတော့ မနက်ဖြန် ဇွန်လ ၂၂ရက်မှာ အုပ်ချုပ်ရေးမှူး ထပ်မံရွေးချယ်သွားမှာ ဖြစ်ပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ်- ရမခ တည်ရှိရာ လားရှိုးမြို့ကို တရုတ်အကူအညီနဲ့ ကိုးကန့်တပ်ထံ ပြန်လည်ထိန်းချုပ်ခွင့်ရခဲ့ပြီး ၎င်းတို့ရဲ့ အုပ်ချုပ်ရေးယန္တရားနဲ့ ပြန်လည်ပတ်နေတာ ၁ နှစ်ကျော်ကြာ ရှိပြီဖြစ်ပါတယ်။
စစ်ကောင်စီတပ်ဟာ လားရှိုးမြို့ပေါ် ရပ်ကွက် ၁၂ ခုကို ပြန်လည်ထိန်းချုပ်ထားပြီး မြို့ပြင်က နေရာတွေကိုတော့ ကိုးကန့်တပ် (MNDAA) က ထိန်းချုပ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
