အလင်း၊ မေလ ၁၉ ရက်၊ တွန်းဇံ
ချင်းပြည်နယ် တွန်းဇံမြို့ကို စစ်ကောင်စီတပ်နဲ့ ဇိုမီးတော်လှန်ရေးတပ်- ZRA ပူးပေါင်းတပ်က လေကြောင်းပစ်ကူနဲ့ စစ်ကြောင်းထိုးပြီး ပြန်လည်သိမ်းပိုက်ခဲ့တယ်လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။
စစ်တပ်နဲ့ ZRA ဟာ ကျီးခါးမြို့နဲ့တီးတိန်မြို့ကနေ အင်အား ၆၀၀ ခန့်နဲ့ ပြီးခဲ့တဲ့ မေလ ၁၁ ရက်ကစပြီး ထိုးစစ်ဆင် တိုက်ခိုက်ခဲ့ရာ ဒီနေ့ မေ ၁၉ ရက်မှာ တွန်းဇံမြို့ကနေ ချင်းတော်လှန်ရေးတပ်ဖွဲ့တွေ ယာယီ ဆုတ်ခွာပေးရတာပဲ ဖြစ်ပါတယ်။
“လေကြောင်းပစ်ကူနဲ့ တွန်းဇံကို ပြန်သိမ်းသွားတာပါ။ တော်လှန်ရေးတပ်ဖွဲ့တွေဘက်က ဒီကနေ့ညနေပိုင်းမှာ မြို့ထဲကနေ တပ်တွေအားလုံး ဆုတ်ခွာလိုက်ပါပြီ” လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။
ချင်းတော်လှန်ရေးတပ်ဖွဲ့တွေဟာ မြို့ကနေ ယာယီ ဆုတ်ခွာပေးခဲ့ရပေမယ့် မြို့အပြင်ဘက်မှာ တိုက်ပွဲ ဆက်လက် ပြင်းထန်နေဆဲဖြစ်တယ်လို့ သိရပါတယ်။
စစ်တပ်ဟာ မြေပြင်ထက် လေကြောင်းပစ်ကူကို အဓိက အားပြုပြီးတော့ တိုက်ခိုက်နေတာဖြစ်ပြီး မနေ့ မေလ ၁၈ ရက်ကလည်း တွန်းဇံမြို့အနီးမှာ တိုက်ပွဲ တစ်နေကုန် ဖြစ်ပွားခဲ့ပါတယ်။
တွန်းဇံမြို့ကို ချင်းတော်လှန်ရေး ပူးပေါင်းတပ်ဖွဲ့တွေက ပြီးခဲ့တဲ့ ၂၀၂၄ ခုနှစ် မေလ ၂၃ ရက်မှာ သိမ်းပိုက်ရရှိခဲ့တာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
