ဝတ်ရည်၊ မေလ ၂၀ ရက်၊ ဒီးမော့ဆို
ကရင်နီပြည် ဒီးမော့ဆို အနောက်ခြမ်းက ၅ နှစ်အောက် ကလေးငယ်တွေဟာ ဝမ်းပျက်ဝမ်းလျှောရောဂါ ခံစားနေရတယ်လို့ ကယန်းအမျိုးသား ကျန်းမာရေးကော်မတီမှ တာဝန်ရှိသူ ဘယ်နဒဲတာက ရွှေဖီမြေကို ပြောပါတယ်။
ဒီးမော့ဆို အနောက်ခြမ်းက ကပါစူကျေးရွာမှာ ၅ နှစ်အောက် ကလေးငယ် ၇ ဦးအပါအဝင် ဒေသခံ ၉ ဦးက ဝမ်းပျက်ဝမ်းလျှော်ရောဂါ ခံစားနေရတာလို့ ဆိုပါတယ်။
“စစချင်းတော့ ၃ ယောက်ပဲ ဖြစ်တာ။ ၁ ယောက်ကတော့ ဆေးရုံကို လွှဲပြောင်းရတာမျိုးအထိ စိုးရိမ်ရတာကြောင့် ကျမတို့ ရွာအထိ ကုသရေးအပိုင်းတွေ စစ်ဆေးရေးအပိုင်းတွေ စစ်ခဲ့ပြီးတဲ့နောက်မှာပဲ နောက် ၉ ယောက် ပြန်တွေ့ခဲ့တာပါ” လို့ ဘယ်နဒဲတာက ပြောပါတယ်။
ကပါစူကျေးရွာမှာ အိမ်ခြေ ၂၃ အိမ် ရှိပေမဲ့ နေအိမ် ၁၀ ကျော်မှာတော့ အိမ်သာ မရှိကြတာကို တွေ့ခဲ့ရတယ်လို့ ၎င်းက ဆိုပါတယ်။
“ကျမတို့ ကျေးရွာကို ရောက်တဲ့အချိန်မှာ နေထိုင်ရေးနဲ့ သန့်ရှင်းမှုအပိုင်းတွေလည်း အားနည်းတယ် ပြောရမှာပေါ့။ ဆပ်ပြာတွေ သုံးတာလည်း မတွေ့ရဘူး။ ရေကြောင့်ဖြစ်တဲ့ရောဂါလို့တော့ သတ်မှတ်လို့ရတာပေါ့။ ကာလအလိုက် ဖြစ်တာမျိုးတော့ မဟုတ်ဘူး”
လက်ရှိမှာ ဒီးမော့ဆို အနောက်ခြမ်းက ကျေးရွာအများစုမှာ ငှက်ဖျားရောဂါကိုလည်း ဒေသခံအများစုက ခံစားနေကြရပါတယ်။
ပြီးခဲ့တဲ့ မေလ ၁၇ ရက်ကလည်း သွေးလွန်တုပ်ကွေးကြောင့် ဒီးမော့ဆိုအနောက်ခြမ်းက စစ်ရှောင် အမျိုးသား ၁ ဦး သေဆုံးခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
