ရွှေဖီမြေ၊ မေလ ၂၆ ရက်
တအာင်း(ပလောင်)ဒေသ နမ့်ဆန်မြို့နယ်က အမျိုးသမီးတစ်ဦးဟာ “ဝ” ပြည်နယ် မိုင်းလားဘက်မှာ အလုပ်သွားရောက်လုပ်ကိုင်မယ်ဆိုပြီး ပွဲစားအချိတ်အဆက်နဲ့ ပြီးခဲ့တဲ့ မေလ ၆ ရက်နေ့မှာ နေအိမ်ကနေ ထွက်ခွာသွားခဲ့ရာ အဆက်အသွယ်မရတော့ပဲ ပျောက်ဆုံးနေတယ်လို့ ဆိုပါတယ်။
ပျောက်ဆုံးနေသူ အမျိုးသမီးဟာ နမ့်ဆန်မြို့နယ် မြို့သစ်ရွာမှာ နေထိုင်တဲ့ လွေးမြအေးဆိုသူဖြစ်ပါတယ်။
လွေးမြအေးရဲ့ အစ်မဖြစ်သူက “ရွာကနေ သူငယ်ချင်း ၄ ယောက်ထွက်သွားတာ။ မိန်းကလေး ၃ ယောက် ယောက်ျားလေး ၁ ယောက်။ တောင်းခုံးမြို့ထဲဝင်ဖို့ ရေကူးပြီးသွားရတာတဲ့။ သူတို့ကို အဲပွဲစားကလာကြိုတာ။ မိန်းကလေး နှစ်ယောက်ကိုအရင် ပို့တာ။ အနောက်မှာ ကျမရဲ့ ညီမနဲ့ အဲယောက်ျားလေးကျန်တာ။ ပြန်လာခေါ်မယ်ဆိုပြီး ပြောတာ။ ပြန်လာတော့ ကျမ ညီမကိုအရင် မခေါ်ဘဲ အဲယောက်ျားကို အရင်ခေါ်သွားတာ။ ညီမကို နောက်ဆုံးမှ လာခေါ်မယ်ဆိုပြီး ပြောတာ။ ညီမကို ပြန်လာခေါ်တဲ့အချိန်ကျမှ ရေထဲပါသွားတာတဲ့။ ကျနော်က ရေကူးတတ်လို့ လွတ်လာတာ။ သူကရေမကူးတတ်တော့ ရေထဲပါသွားတယ်ဆိုပြီး အဲ ၃ ယောက်ဆီ ပြန်လာပြောတာ” လို့ ပြောပါတယ်။
လွေးမြအေးရဲ့ သူငယ်ချင်းဖြစ်သူ ၃ ဦးနဲ့ ဆက်သွယ်ရပေမယ့် လွေးမြအေးရဲ့ သတင်းအစအန မတွေ့တာကြောင့် ရေထဲပါသွားတာ မဟုတ်ဘဲ လူကုန်ခံရတာ ဖြစ်နိုင်တယ်လို့ အစ်မဖြစ်သူက ဆိုပါတယ်။
“ကျမတော့ သူရေထဲပါသွားတာကို မယုံဘူးပေါ့နော်။ တကယ်တမ်း ကျမရဲ့ ညီမကို အရင်ခေါ်သွားရမယ်လေနော်။ အဲယောက်ျားကို အရင်လာခေါ်တယ်ဆိုတော့ အဲကတည်းက ဘာသတင်းမှမကြားရတော့ဘူး။ သူ့ရဲ့သူငယ်ချင်းတွေက သူ့ယောက်ျားဆီပြောလာလို့ သိရတာ။ ရောင်းစားခံရမှာကို ကျမတို့ စိုးရိမ်တယ်” လို့ ပြောပါတယ်။
လွေးမြအေးကို တွေ့ရှိတဲ့သူတွေအနေနဲ့ မိသားစုဝင်ဖုန်းဖြစ်တဲ့ (တရုတ်ဖုန်းနံပါတ် – 184 699 547 84 ) ကို ဆက်သွယ်ပေးဖို့ မိသားစုဝင်တွေက တောင်းဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
