အလင်း၊ ဇူလိုင် ၁၆ ရက်၊ ဖလမ်း
ချင်းပြည်နယ်၊ ဖလမ်းမြို့မှာ ပျောက်ဆုံးနေတဲ့ ပညာရေးခရိုင်ရုံးဝန်ထမ်း Pu Pate ရဲ့ ရုပ်အလောင်းကို မနေ့ ဇူလိုင်လ ၁၅ ရက်နေ့မှာ Vankau ရပ်ကွက်၊ RC ဘုရားကျောင်းအနီးမှာ ပြန်လည်တွေ့ရှိခဲ့တယ်လို့ ဒေသခံတွေဆီက သိရပါတယ်။
သေဆုံးသူကို တွေ့ရှိချိန်မှာ သတ်ဖြတ်ခံထားရတဲ့ ဒဏ်ရာတွေနဲ့ တွေ့ရှိခဲ့ရပြီး ဝတ်ဆင်ထားတဲ့ အဝတ်အစားတွေနဲ့ ခွဲခြားသတ်မှတ်ခဲ့တာဖြစ်ပါတယ်။
အလောင်းတွေ့ရှိတဲ့နေရာဟာ စစ်ကောင်စီတပ်ဖွဲ့ဝင်တွေ တပ်စွဲထားတဲ့နေရာနဲ့ နီးစပ်ပြီး ၎င်းတို့ရဲ့ ထိန်းချုပ်မှုအောက်မှာရှိတဲ့ နေရာမှာ ဖြစ်နေပါတယ်။
“ပျောက်နေတာက ၁၀ ရက်လောက်ရှိပြီ။ မနေ့က ပြန်တွေ့တဲ့ အလောင်းမှာလည်း ဒဏ်ရာတွေနဲ့ မမှိတ်မိတော့ဘူး။ သူဝတ်ထားတဲ့ အဝတ်အစားတွေနဲ့ ခွဲခြားနိုင်တာပါ။ စစ်သားတွေနေတဲ့ နေရာအနားမှာတွေ့တယ်ဆိုတော့ မြို့ခံတွေက သူတို့လက်ချက်ပါပဲလို့ သုံးသပ်ကြတယ်။”လို့ ဖလမ်းမြို့ခံတစ်ဦးက ရွှေဖီမြေသို့ ပြောပါတယ်။
သေဆုံးသူ Pu Pate ဟာ ဇနီးဖြစ်သူ ၂၀၂၅ ခုနှစ်မှာ ကလေးမြို့မှာ စစ်ဘေးရှောင်ရင်း ကွယ်လွန်သွားခဲ့ပြီးနောက် သမီးနှစ်ဦး ကျန်ရစ်ခဲ့ပြီး တွေ့ရှိရတဲ့ ရုပ်အလောင်းကို ဒေသခံတွေက Lampa သုဿာန်မှာ သင်္ဂြိုဟ်ပေးခဲ့ပါတယ်။
“သူက သဘောကောင်းတော့ လူချစ်လူခင်ပေါ့တယ်။ ဘာကြောင့် အသတ်ခံရတာလဲ မပြောတက်ဘူး။ ဇနီးလည်း ကလေးမြို့မှာ စစ်ဘေးရှောင်ရင်း ကွယ်လွန်သွားတယ်။ အခုသမီးနှစ်ယောက်ကျန်ခဲ့တယ်။ အားလုံးက စိတ်မကောင်းကြဘူး။” လို့ အထက်ပါ ဖလမ်းမြို့ခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ ဇူလိုင် ၁၁ ရက်ကလည်း ဖလမ်း-ဟားခါးလမ်းပိုင်းရှိ စစ်ဆေးရေးဂိတ်တစ်ခုမှာ စစ်ကောင်စီတပ်ဖွဲ့ဝင်တွေ ဖမ်းဆီးသွားတဲ့ အမျိုးသားနှစ်ဦးအနက် တစ်ဦးမှာ သေဆုံးခဲ့ပြီး တစ်ဦးမှာ ဖလမ်းမြို့ ယာယီဆေးရုံမှာ ဆေးကုသမှုခံယူနေရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
