မိုင်းရူပ၊ ဇူလိုင် ၁၇ ရက်၊ ချောက်
မကွေးတိုင်း၊ ချောက်မြို့နယ်မှာ ပြည်သူ့ကာကွယ်ရေးတပ် (PDF) ရဲဘော် ၂၀ ဦးကို သတ်ဖြတ်ခဲ့တဲ့ စစ်ကောင်စီရဲ့ ရဲယာဉ်တန်း မိုင်းဆွဲတိုက်ခိုက်ခံရပြီး ၅ ဦးသေဆုံးကာ ၇ ဦး ဒဏ်ရာရခဲ့တယ်လို့ ဆိပ်ဖြူမြို့နယ် မြောက်ပိုင်းပြည်သူ့ကာကွယ်ရေးအဖွဲ့က ထုတ်ပြန်ပါတယ်။
မနေ့က ဇူလိုင် ၁၅ ရက်မှာ ချောက်မြို့နယ်ကနေ ဆိပ်ဖြူ-ဆောလမ်းပိုင်းအတိုင်း ထွက်လာတဲ့ စစ်ကောင်စီရဲ့ ရဲယာဉ်တန်း ၂ စီးကို တော်လှန်ရေးတပ်တွေဘက်က မိုင်းဆွဲတိုက်ခိုက်ခဲ့တာ ဖြစ်ပါတယ်။
တိုက်ခိုက်မှုအတွင်း စစ်ကောင်စီဘက်က ၅ ဦးသေဆုံးပြီး ၇ ဦး ဒဏ်ရာအပြင်းအထန် ရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
“ကား ၂ စီးနဲ့ အင်အား ၅၀ ကျော်ပါတဲ့ ယာဉ်တန်းကို ဆိပ်ဖြူ-ဆောလမ်းပိုင်း တစ်နေရာမှာ တိုက်ခိုက်ခဲ့တာပါ။ စစ်ကောင်စီဘက်က ၅ ကောင်သေတယ်။
၇ ဦး ဒဏ်ရာရတယ်လို့ ကနဦး သိရတယ်” လို့ ဆိပ်ဖြူမြို့နယ် မြောက်ပိုင်းပြည်သူ့ကာကွယ်ရေးအဖွဲ့ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒီတိုက်ခိုက်မှုကို ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ (NSP ပကဖ) နဲ့ ပခုက္ကူခရိုင် အမှတ် (၄) တပ်ရင်း၊ တပ်ခွဲ (၃) တို့ ပူးပေါင်းလုပ်ဆောင်ခဲ့တာဖြစ်တယ်လို့ ဆိုပါတယ်။
စစ်ကောင်စီဘက်ကတော့ ဆိပ်ဖြူ-ဆောလမ်းပိုင်းမှာ ယာဉ်တန်းတိုက်ခိုက်ခံရတာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ဇူလိုင် ၁၀ ရက်မှာ ချောက်မြို့နယ် တောင်သာကျေးရွာအနီး စစ်ကောင်စီရဲ့ ရဲကွန်မန်ဒိုတပ်ဖွဲ့တွေ ပါဝင်တဲ့ စစ်ကြောင်းကို ပိတ်ဆို့တိုက်ခိုက်ရာက PDF ရဲဘော် ၂၀ ဦး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
