ရွှေဖီမြေ၊ ဇူလိုင် ၃၁ ရက်၊ ပန်ဆန်း
“ဝ”ပြည် ပန်ဆန်းခေါ် ပန်ခမ်းမြို့နယ် နာလော့ကျေးရွာအုပ်စု ယုံပန်းရွာမှာ ပြီးခဲ့တဲ့ ဇွန်လ ၄ ရက်က ပေါက်နီဆိုတဲ့ အသက် ၅၀ ဝန်းကျင် အမျိုးသားက ဇနီးဖြစ်သူကို ဓားမနဲ့ ခုတ်သတ်ခဲ့တဲ့ဖြစ်စဉ် ဖြစ်ပွားခဲ့ပါတယ်။
မိန်းမဖြစ်သူကို ခုတ်သတ်ပြီး အိမ်နီးချင်းလူ ၃ ဦးကိုလည်း တိုက်ခိုက်ခဲ့တာကြောင့် ၂ ဦး ထိခိုက်ဒဏ်ရာ ရရှိခဲ့ကြပါတယ်။
အဲဒီအမျိုးသားကို “ဝ”ပြည်တရားစီရင်ရေးက ဖမ်းဆီးခဲ့တယ်လို့ ဇွန်လ ၁၀ ရက်မှာ ထုတ်ပြန်ပြီး အဲဒီအမျိုးသားဟာ ကာလကြာမြင့်စွာ မူးယစ်ဆေးဝါး သုံးစွဲတာ တွေ့ရှိပြီး မိသားစုဝင်နဲ့ ငွေကြေးပြဿနာ ဖြစ်ပွားနေသူ ဖြစ်တယ်လို့ ထုတ်ပြန်ချက်ထဲ ဖော်ပြထားပါတယ်။
မနေ့ ဇူလိုင် ၃၀ ရက်မှာတော့ ပေါက်နီကို ရည်ရွယ်ချက်ရှိရှိ လူသတ်မှု ကျူးလွန်ထားကြောင်း စစ်ဆေးတွေ့ရှိတဲ့အတွက် “ဝ”ပြည်အခြေခံဥပဒေနဲ့ ရာဇသတ်ကြီး အခန်း ၄ ပြဌာန်းချက်အရ သေဒဏ် ချမှတ်လိုက်တယ်လို့ WSP က ထုတ်ပြန်ပါတယ်။
ဒေသဏ် စီရင်ရာမှာ သေနတ်နဲ့ ပစ်ခတ်ကွပ်မျက်လိုက်တယ်လို့ ဆက်လက် ဖော်ပြထားပြီး ရုပ်ပုံတွေကိုတော့ ထုတ်ပြန်တာ မရှိပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
