ပို့လဘား၊ ဇွန်လ ၂၉ ရက်၊ မူဆယ်
စစ်ကောင်စီ ထိန်းချုပ်ထားတဲ့ တရုတ်-မြန်မာနယ်စပ် မူဆယ်မြို့မှာ တောင်ကျရေတွေကြောင့် မြေနိမ့်ပိုင်းမှာရှိတဲ့ ရပ်ကွက်တချို့ ရေကြီးရေလျှံ ဖြစ်ပွားနေတယ်လို့ ဒေသခံတွေဆီက သိရပါတယ်။
ဒီနေ့ ဇွန်လ ၂၉ ရက် နေ့လယ် ၂ နာရီဝန်းကျင်မှာ မိုး စတင်ရွာသွန်းတာဖြစ်ပြီး မြေနိမ့်ပိုင်းဖြစ်တဲ့ မန်ဝိန်း၊ ဟိုမွန်၊ မြို့လယ်နဲ့ ဆင်ဖြူပေါက်အနီး စတဲ့ရပ်ကွက်တွေမှာ ရေကြီးပြီး ကားလမ်းလည်း ပိတ်နေတယ်လို့ ဆိုပါတယ်။
“ဒီနေ့ မိုး အရမ်းကြီးတယ်။ အလယ်ပေါက်ဘက်နဲ့ ဆင်ဖြူပေါက်နားမှာ အဲဘက်တွေကျ မြေနိမ့်တဲ့နေရာဖြစ်လို့ နှစ်တိုင်း ရေကြီးတယ်။ တောင်ကျရေတွေကြောင့်လည်း ပါတာပေါ့။ ကျနော်တို့ရပ်ကွက်ဆို ကားတွေလည်း သွားလာလို့မရဘူး။ ပိတ်နေတယ်”
မူဆယ်မြို့ရှိ ကောင်းမှုလွယ်၊ ဟိုနား၊ စက်မှုဇုန်၊ စွမ်စော်ရပ်ကွက်နဲ့ ဆင်ဖြူဂိတ်တွေမှာ နှစ်စဉ် မိုးရာသီရောက်တိုင်း ရေကြီးရေလျှံတာတွေ ဖြစ်ပွားနေပြီး နေအိမ် ပျက်စီးတာတွေလည်း ရှိခဲ့ပါတယ်။
မူဆယ်မြို့အပြင် တခြားဒေသဖြစ်တဲ့ ကချင်ပြည်နယ် ဖားကန့်နဲ့ မိုးကောင်းမြို့ဘက်မှာလည်း ဒီနေ့ ဇွန်လ ၂၉ ရက် နေ့လယ် ၂ နာရီဝန်းကျင်မှာ မိုးဆက်တိုက်ရွာသွန်းမှုကြောင့် ရေကြီးရေလျှံမှု ဖြစ်ပွားနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
