ဝတ်ရည်၊ ကျံရ်ဇူန် ဆငည်း 30၊ နမ့်တစ်
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဖုင်ဆျှိုည်ဖီမျေဒါ ဒီထိင်ခြဲ တံပ်ဆီုက်ဝ UWSA ကဲ ခေဲင်ကီုင်းနမ့်တစ်နီန် UWSA ကဲချဟာဝ်းတာမ်ယံမ်း တကောန်အီမာည်း ကဝ်အီကဇာဝ်းဖါ်ႈတောပ်မာအ်ုန် စီပျံမ်ဟာဝ်းမာအ်ုန်နီန်အောႏ။
ကဲဒါႈ ကဝ်အီမိုႈကောန် Ping Suang ling နီန် ပဲန်ဖါ်ႈကအေဲႈကဇာဝ်းတောပ် မာအ်ုန် ကဝ်အီဘိူန်းအဆာက် 80 ဆန်ုမ်နီန် ဂေါႇမိုႈအ်ုန်မဲႈဟာဝ်းမာအ်ုန် ကံပ်ပဲန်ယံမ်းနီန် ခည်ကျံရ်ဇူန် ဆငည်း 28 ဒိူန် တံပ်ဆီုက်ဝကဲစီ ချဟာဝ်းတာမ်ယံမ်းတအ်ုန်အောႏ။
ကဝ်အီဒဲႈဆဒါင်ရကႎိုည်နီန် က္လာင်းဒါႈ “ ကဲဒါအမှုလှေဒီန် အ်ုန်ပဲန်ဆီုင်ခည်ကျံရ် 3 နီန်။ အ်ုန်မဲႈမာအ်ုန်။ ခံင်မိုႈတိုအီးဒါင်းဒီန် အာဝ်ဘယ်ခါမ်ဒီကော်။ ကောန်အ်ုန်မိုႈ ကညာအိုမ်ဆနံမ်။ မာအ်ုန်ယံမ်း ဘံန်ရောတ်ပယုင်ဆနံမ်ဒါင်းနီန်”။
ဆဲႈဒါႇဒီန် ခည်ကျံရ်အေပ်ြုရ် ဆငည်း 2 ဒိူန်မာ် ကဲချဟာဝ်းဘိုး တာမ်ယံမ်းတ ကောန်အီမာည်း ကဝ်အီလူည်ႇအမှုပျံမ်းတိုအီးနီန် ရအာည်ႇတိုအီးဂီုန်းနီန် အ်ုန်အီမိုႈ ဒူန်းအ်ုန် ကောန်အီပ်ုန် ကဝ်အီကဇောည်ႇဒဲႈ ကနာည်နံင် ပ်ုန်ဟြာည်ကမာ်ႈ တိုပိုင်းခန္ဓာယံမ်းနီန်မာ် ကဲချဟာဝ်းတာမ်ကဘေဲမ်အောႏ။
ခည်ကျံရ်မာချှ် ဆငည်း 29 ဒိူန်မာ် ကဲချဟာဝ်း တာမ်ယံမ်း တကဲအီဇောႈကဘေဲမ် 4 အီး အီပျံမ်းဟာဝ်း ကဝ်အီရံပ်ဇီုင်းကပ္လိူင် ခေဲင်ကဘေဲမ်နီန်အူအီးအောႏ။
UWSA ကဲ မိူဝ်ႈဘည်ချဟာဝ်း တာမ်ယံမ်းနီန်တ တြာခါမ် ကဝ်အီလူည်ႇအမှုကဲ ရအာည်ႇတိုအီးအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
