ဟွမ်လောဝ်၊ ဇွန်လ ၂၄ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့မှာ အသက် ၁၃ နှစ်ဝန်းကျင် ကလေးငယ်နဲ့ အမျိုးသမီးတစ်ဦး ဓားနဲ့ခုတ်ခံရပြီး ဆိုင်ကယ်လည်း လုယက်ခံခဲ့ရတယ်လို့ လားရှိုးမြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၂၂ ရက်မှာ လားရှိုးမြို့ ရပ်ကွက်(၁) ထင်းရှူးမြိုင်အတက်လမ်းမှာ ဆိုင်ကယ်နဲ့ ဈေးသွားတဲ့အချိန် အမျိုးသား ၂ ဦးက ဓားနဲ့ခုတ်ပြီး ဆိုင်ကယ် လုယက်ခဲ့တာလို့ ဆိုပါတယ်။
လားရှိုးမြို့နေ အမျိုးသမီးက “အဲကောင်မလေးက သူ့လက် ထိသွားလို့ ဆေးရုံတောင် သွားလိုက်ရသေးတယ်။ ဆေးရုံ ဆင်းပြီလားတော့ သေချာမသိဘူး။ သူ့တူလေးလားတော့ မသိပါဘူး။ သူတို့နှစ်ယောက် အတူတူဈေးသွားရင်းနဲ့ လုယက်ခံရတာ။ အဲဒီကလေးလည်း ဓားခုတ်ဒဏ်ရာ ရတယ်။ ဆိုးဆိုးဝါးဝါး ထိထားလားဆိုတာတော့ သေချာမသိရဘူး” လို့ ပြောပါတယ်။
လားရှိုးမြို့မှာ ဓားပြတိုက်မှုအပါအဝင် လုယက်မှု၊ ပြန်ပေးဆွဲမှုနဲ့ လူသတ်မှုတွေက ဓလေ့တစ်ခုလို ဖြစ်နေပြီး ဒီကိစ္စတွေက လားရှိုးမြို့မှာ အထူးအဆန်း မဟုတ်တော့ဘူးလို့ ဒေသခံတွေက ရွှေဖီမြေကို ပြောဆိုပါတယ်။
စစ်တပ် ထိန်းချုပ်ထားတဲ့ဒေသဖြစ်တဲ့ မူဆယ်၊ လားရှိုး၊ တာချီလိတ်၊ ကျိုင်းတုံ၊ တန့်ယန်းမြို့အပြင် အခြားမြို့တွေမှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်း အရင်ကထက် များလာပြီး ခိုးမှု၊ လုယက်မှု၊ ဓားပြတိုက်မှုနဲ့ လူသတ်မှုလည်း မကြာခဏ ဖြစ်ပွားနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
