မိုင်းဖြတ်မြို့အနီးမှာ ပြိုကျလာတဲ့ ကျောက်တုံးထိပြီး ကားသမား ၁ ဦး သေဆုံး၊ ၁ ဦး ဒဏ်ရာရ

ပပ၊ မေလ ၂၅ ရက်၊ မိုင်းဖြတ်

‎ရှမ်းအရှေ့ မိုင်းဖြတ်မြို့နယ်မှာ ပြိုကျလာတဲ့ ကျောက်တုံး ထိတာကြောင့် ကားသမား ၁ ဦး သေဆုံးပြီး ၁ ဦး ဒဏ်ရာရခဲ့ကြောင်း ဖြစ်စဉ်သိရှိတဲ့ အမျိုးသားတစ်ဦးရဲ့ ပြောပြချက်အရ သိရပါတယ်။

‎မနေ့ မေလ ၂၄ ရက် ညပိုင်းမှာ မိုင်းဖြတ်မြို့နယ် တာကျောက်ရွာအနီးမှာ ကားနားပြီး ရေဖြည့်နေတဲ့ ကားသမားနဲ့ ယာဉ်နောက်လိုက်သူ အပေါ်ကို ကမ်းပါးပြိုကျကာ ကျောက်တုံးလိမ့်ကျခဲ့တာ ဖြစ်ပါတယ်။

‎ဖြစ်စဉ်ကိုသိရသူ အမျိုးသားက “အဲနေရာမှာ ခရီးသည်ကားတွေ မကြာခဏ ရပ်ကြလေ့ရှိတယ်။ ဒီတလောက မိုးတအားရွာတော့ မြေက ပျော့ပြီး ကမ်းကပြိုကျလာတာ” လို့ ပြောပါတယ်။

‎၎င်းအမျိုးသား ၂ ဦးဟာ အသက် ၃၀ ဝန်းကျင်ရှိသူတွေဖြစ်ပြီး ကျောက်တုံးထိလို့ ခြေထောက်နဲ့ ရင်ဘတ်တွေမှာ ပြင်းထန်ဒဏ်ရာနဲ့ပဲ ယာဉ်မောင်းဖြစ်သူအမျိုးသားက သေဆုံးသွားခဲ့တာဖြစ်ပါတယ်။ မိုင်းဖြတ်ဆေးရုံပို့ချိန် လမ်းတစ်ဝက်မှာ သေဆုံးသွားခဲ့တာလို့ သူက ဆိုပါတယ်။

‎ဒီဖြစ်စဥ်မျိုး ထပ်မဖြစ်စေဖို့ ၎င်းနေရာမှာ ကားသမားနဲ့ ခရီးသည်တွေ မရပ်နားဖို့ မေတ္တာရပ်ခံချင်ကြောင်း အထက်ပါအမျိုးသားက ဆက်ပြောပါတယ်။

‎အဲဒီနေရာမှာ ပြီးခဲ့တဲ့နှစ်ကလည်း ကားသမားတယောက် ကားပေါ်ကနေ လမ်းဆင်းကြည့်နေချိန် ကမ်းပါးပေါ်က ကွာကျလာတဲ့ ကျောက်ပြားထိတာကြောင့် ခန္ဓာကိုယ်နှစ်ခြမ်းကွဲပြီး သေဆုံးခဲ့ဖူးကြောင်း ဒေသခံတွေရဲ့ ပြောပြချက်အရ သိရပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။