လေကြောင်းတိုက်ခိုက်မှု

စစ်ကိုင်းတိုင်း ကောလင်းမြို့နယ်အရှေ့ဘက်ခြမ်းက ရှမ်းကုန်းရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်မှုကြောင့် ဒေသခံ ၁ ဦးသေဆုံးပြီး ၃ ဦးဒဏ်ရာရခဲ့တယ်လို့ ဒေသခံတစ်ဦးက ရွှေဖီမြေကိုပြောပါတယ်။

ရခိုင်ပြည် ကျောက်ဖြူမြို့နယ်က စစ်ရှောင်တွေ နေထိုင်တဲ့နေရာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စစ်ရှောင် ၂ ဦးသေဆုံးပြီး ကလေးငယ် ၁ ဦးအပါအဝင် ၅ ဦး ဒဏ်ရာရရှိခဲ့တယ်လို့ အာရက္ခတပ်တော်- AA က ထုတ်ပြန်ထားပါတယ်။

ကရင်အမျိုးသားအစည်းအရုံး (KNU) ထိန်းချုပ်နယ်မြေဖြစ်တဲ့ ခလယ်လွီထူခရိုင် ကျောက်ကြီး(လယ်ဒို)မြို့နယ်၊ မုန်း(မူး)မြို့နယ်နဲ့ ပလာယာခရိုင် နို့တကောမြို့နယ်မှာ စစ်ကောင်စီတပ်ရဲ့ လက်နက်ကြီး ပစ်ခတ်တာ၊ ဒရုန်းဗုံးကြဲတာနဲ့ သေနတ်တွေနဲ့ ပစ်ခတ်တာကြောင့် ဒေသခံ ၄ ဦး သေဆုံးခဲ့တယ်လို့ KNU က မနေ့ ဇန်နဝါရီ ၂၃ ရက်မှာ ထုတ်ပြန်ထားပါတယ်။

အင်းတော်မြို့နယ် မော်လူးမြို့‌မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ ပြည်သူ့ကာကွယ်ရေး (ပကဖ) တပ်ဖွဲ့ဝင် ၅ ဦး ကျဆုံးသွားခဲ့တယ်လို့ သိရပါတယ်။

မကွေးတိုင်း၊ အောင်လံမြို့နယ်၊ တပ်ကုန်းကျေးရွာ မင်္ဂလာဆောင်မဏ္ဍပ် ဗုံးကြဲခံရလို့ လသားအရွယ် ကလေးငယ်တစ်ဦးအပါဝင် ၅ ဦး သေဆုံးပြီး ၁၀ ဦးထက်မနည်း ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။

ကချင်ပြည်နယ်၊ ဗန်းမော်မြို့နယ်၊ ဧရာဝတီမြစ်ရဲ့ အနောက်ဘက်ကမ်းက ထီလင်း(ကောင်ဂျာ)ရွာမှာ မနေ့ ဇန်နဝါရီလ ၂၂ ရက်နေ့ ညနေပိုင်းက နာရေးလုပ်နေတဲ့ အိမ်ကို စစ်ကောင်စီ ဗုံးကြဲလို့ ဒေသခံပြည်သူ ၁၈ ဦး ဝန်းကျင် သေဆုံးပြီး ၂၀ ကျော် ထိခိုက် ဒဏ်ရာရကြောင်း ဒေသခံတွေဆီက သိရပါတယ်။

အာရက္ခတပ်တပ်တော် – AA ထိန်းချုပ်မြို့နယ်အတွင်းရှိ စစ်သုံ့ပန်းထိန်းသိမ်းထားတဲ့ နေရာတွေကို စစ်ကောင်စီတပ်က ဂျက်ဖိုက်တာနဲ့ ဗုံး ၄ လုံးကြဲချခဲ့တာကြောင့် ဗုံးကြဲခံရတဲ့နေရာအနီးမှာရှိတဲ့ စစ်သုံ့ပန်းတွေနဲ့ တပ်ဖွဲ့မိသားစုဝင်တချို့ ပွဲချင်းပြီး သေဆုံးသွားခဲ့တယ်လို့ AA က ထုတ်ပြန်ခဲ့ပါတယ်။

မကွေးတိုင်း ဆောမြို့နယ် လယ်ကြီးအိုင့်ကျေးရွာကို စစ်ကောင်စီတပ်က ဗုံးကြဲတိုက်ခိုက်လို့ ဒေသခံ ၁ ဦးသေဆုံးပြီး ၄ ဦးဒဏ်ရာရရှိခဲ့တယ်လို့ ယောအလင်းတန်းက ကိုအောင်ကြီးက ရွှေဖီမြေကို ပြောပါတယ်။

စစ်ကိုင်းတိုင်း ဒီပဲယင်းမြို့နယ် ပျံကျကျေးရွာကို စစ်ကောင်စီတပ်က လေကြောင်းကနေ ဂျက်ဖိုက်တာနဲ့ ဗုံးကြဲခဲ့တာကြောင့် ဒေသခံ အမျိုးသမီးတစ်ဦး သေဆုံးခဲ့တယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။