မာည်းရူပ၊ ကျံရ်အောဂ်ုတ် ဆငည်း 16၊ နောင်ခေဝ်
ကဝ်အီဂေါည်ခေဲင်ပ္လေါည်ကတီုက်ကပဴင်ကဲ က္လာင်းဒါႈ ဘံန်ႎီရ်ဘိူန်းတံပ်ကညာအာဏာဆီုက်ဇေဝ်ကဲတ ထိင်ခြဲ ကီုင်းနောင်ခေဝ် ဒီပ်ုန်ထိင်ခြဲတံပ်ဆီုက်တအာင်း PSLF/TNLA ကဲနီန် တံပ်ကညာအာဏာဆီုက်ဇေဝ်ကဲ ထိုးဟာဝ်းဘိုးကဒါႇရဝ် အ်ုန်အီဂေါည်ပဒေင်နောင်ခေဝ် ကာည်း မိုဂူႈနီန် ပ္လေါည်ကတီုက်ကပဴင်မာ် ဂီုည်ဒါ့်ပဲန်ကရဲင်အောႏ။
ကဲဒါႈ အမှိူဝ် ကျံရ်အောဂ်ုတ် ဆငည်း 15 နီန် တံပ်ကညာအာဏာဆီုက်ဇေဝ်ကဲ ဟည်ဘယ်ဒေထိင်ခြဲ ရဝ်ဒိုးပင်းအ်ုန်အီဂေါည် ပဒေင်နောင်ခေဝ် ကာည်း မိုဂူႈနီန် ပ္လေါည်ကတီုက်ကပဴင်မာ် ဂီုည်ဆီုပ်ပဲန်ကရဲင်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန် အူအီး က္လာင်းတဖုင်ဆျှိုည်ဖီမျေဒါႈ “ ကဒါႇတံပ်ကညာအာဏာဆီုက်ဇေဝ်ကဲ ဒါပွံတ်ရဲင်ဘ္လောမ်ဂီုန်းထိုးလီပ်ဒေဲႈ။ အူဆငည်းဒီန် ကဲဒါဂီုန်းခည်း ဒရုန်းနီန်ပဴင်ဒေဲႈ။ ကဇေန်နီး တံပ်ကညာအာဏာဆီုက်ဇေဝ်ကဲ ဟည်ခ္လေါႈရဝ်ဒိုးပင်နီန်။ ပ္လေါည်ကတီုက်ကပဴင်နီန်မာ် ဂီုည်ဆီုပ်ပဲန်ကရဲင်လိူည်”။
တံပ်ကညာအာဏာဆီုက်ဇေဝ်ကဲ ဂီုည်ဆီုပ်ထိုးလီပ်ဟာဝ်း ကဒါႇရဝ်အ်ုန်အီဂေါည် ပဒေင်နောင်ခေဝ် ကာည်း မိုဂူႈနီန် ရဝ်ဆမ္မဆယ်၊ သုံးဆယ်၊ ဟိုခို ကာည်း ဒိုးပင်နီန် တံပ်ကညာအာဏာဆီုက်ဇေဝ်ကဲ ဟည်ဘယ်ဒေဆီမ်းဟာဝ်းအောႏ။
အူကဒါႇမာ် ကဲဂီုည်ဒါယာန်ပ်ုရ် ပျောႈကစံပ်ဟာဝ်းဘျုင် ခေဲင်ကီုင်းမိုဂူႈနီန် ခည်ကျံရ်အောဂ်ုတ် ဆငည်း 14 ခီမှိူဝ် ကပံတ် 8 နြီလေႈ 30 မနေတ်ဒိူန်မာ် ကဲပျောႈဟာဝ်းဘျုင် ပမိုဂူႈနီန် တိုအီးအရာပ်ကဲ ယံမ်းဟာဝ်းပွံတ် 21 အီးအောႏ။
တံပ်ဆီုက်တအာင်း TNLA ကာည်း တံပ်ကညာအာဏာဆီုက်ဇေဝ်ကဲ ဘိူည်ပဲန်ဟာဝ်းပ္လေါည်ကတိုက်ကပဴင် ပဒေင်နောင်ခေဝ် ကာည်း မိုဂူႈနီန်မာ် တံပ်ကဲပည်အာရ်ကဒါႇညှံမ်မိူဝ်ႈစိ ဘည်ပ္လိူရ်ႈလေႈကဲတ အီကဆီုဝ်ကဆဲင်တောပ် ပ္လေါည်ကတီုက်ကပဴင်နီန်အောႏ။
ဘံန်ဟောည်ႇထိင် TNLA ကဲကာည်း တံပ်ကပိုမ်ကဲတ ကီုင်းနော်င်ခေဝ်နီန် လှေင်ဘြည် 1ဆန်ုမ်လေႈ ခည်ကျံရ်ဇူန်လည် ဆငည်း 16ဒိူန် ကဲဟည်ဘ်ုပ် ပ္လေႈႎီရ်ဘိုးတတည်း တံပ်ကညာအာဏာဆီုက်ဇေဝ်ကဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
