မိုင်းရူပ၊ သြဂုတ် ၁၆ ရက်၊ နောင်ချို
တအာင်းတပ်မတော်- PSLF/TNLA ထိန်းချုပ်ထားတဲ့ နောင်ချိုမြို့ကို ပြန်ရပြီးနောက် နောင်ချို-မိုးကုတ်လမ်းပိုင်းရှိ ကျေးရွာတွေကို စစ်တပ်ဘက်က ဆက်လက် ထိုးစစ်ဆင်နေပြီး တိုက်ပွဲ ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
မနေ့ သြဂုတ် ၁၅ ရက်အထိ စစ်တပ် စစ်ကြောင်းဟာ နောင်ချို-မိုးကုတ်လမ်းပေါ်ရှိ ဒိုးပင်းကျေးရွာကို စစ်တပ်ဘက်က ပြန်ထိန်းချုပ်နိုင်ခဲ့ပြီး တိုက်ပွဲ ဆက်လက် ပြင်းထန်နေတယ်လို့ ဆိုပါတယ်။
“စစ်တပ်ဘက်က အင်အားအများအပြား သုံးပြီး ထိုးစစ်လုပ်တာ။ တစ်ရက်ကို ဒရုန်းတွေ အများကြီး သုံးတယ်။ အခုက စစ်တပ်ဘက်က ဒိုးပင်ရွာကျော်အထိ ရောက်လာပြီ။ တိုက်ပွဲက ဆက်ဖြစ်နေတုန်းပဲ” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
စစ်တပ် စစ်ကြောင်းဟာ နောင်ချို-မိုးကုတ်လမ်းပေါ်ရှိ ကျေးရွာတွေကို ဆက်တိုက် ထိုးစစ်ဆင်နေတာဖြစ်ပြီး ဆမ္မဆယ်၊ သုံးဆယ်၊ ဟိုခိုနဲ့ ဒိုးပင် စတဲ့ကျေးရွာကြီးတွေကို ဆက်တိုက် သိမ်းယူနေတာ ဖြစ်ပါတယ်။
တစ်ဖက်မှာလည်း မိုးကုတ်မြို့ပေါ်ကို လေကြောင်းနဲ့ ဗုံးကြဲတိုက်ခိုက်တာတွေ ဆက်တိုက် ပြုလုပ်နေပြီး ဩဂုတ် ၁၄ ရက် ည ၈ နာရီခွဲက ဗုံးကြဲတိုက်ခိုက်မှုမှာ သေဆုံးသူ အရပ်သား ၂၁ ဦးအထိ ရှိခဲ့ပါတယ်။
TNLA နဲ့ စစ်တပ်ဘက်ကတော့ နောင်ချို-မိုးကုတ်လမ်းမှာ ဖြစ်ပွားနေတဲ့ တိုက်ပွဲတွေနဲ့ ပတ်သက်ပြီး တစုံတရာ သတင်းထုတ်ပြန်ထားတာ မရှိသေးပါဘူး။
TNLA နဲ့ ပူးပေါင်းတပ်တွေ ထိန်းချုပ်ထားတဲ့ နောင်ချိုမြို့ကို ၁ နှစ်အကြာ ပြီးခဲ့တဲ့ ဇူလိုင် ၁၆ ရက်မှာ စစ်တပ်ထံ ပြန်လည် လက်လွှတ်ခဲ့ရတာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
