လွေးလာဝ်ဇာရ်၊ အောဂ်ုတ် ဆငည်း 13၊နောင်ခေဝ်
ကဝ်အီနံပ်ဘည်မိုႈဘည်ဘာည်းနီန် အူအီးက္လာင်းတဖုင်ဆျှိုည်ဖီမျေဒါႈ ကပီုန်ဆျှံမ်ကဒါႇပိူည် ပအရာပ်ထိင်ခြဲတံပ်ဆီုက်တအာင်းကဲ ပရဝ်ပင်ပေါ အ်ုန်အီဂေါည် ခနားမာဝ်းႎံင်း ကာည်း နောင်ခေဝ်နီန် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ဂါင်ဂေါည်ပေန်ခ္လမာ် လူလှဲဝ်ႏဟာဝ်းအောႏ။
အဒိူဝ် ကျံရ်အောဂ်ုတ် ဆငည်း 13 ခီညှာဇေဝ်း ကပံတ် 12 နာရီလေႈ 30 မနေတ်ဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဂျက်ဒေဲႈပျောႈဟာဝ်းဘျုင် 2 ပိုင်း ဂေါႇဘည်ဒီန် ဂါင်ဂေါည်မာ် လူလှဲဝ်ႏဟာဝ်း 2 ကြောင်အောႏ။
ကဝ်အီနံပ် ဘည်မိုႈဘည်ဘာည်းနီန် အူအီးက္လာင်းဒါႈ “ ခီမှိူဝ် ငျားခိင်အီတ်ဆငဲႈအီး ကဲဒေဲႈပျောႈဟာဝ်း 2 ပိုင်း။ ဂါင်လူလှဲဝ်ႏ 2 ကြောင်။ ဂေါႇရဲင်ဘ္လောမ်ဘျုင်ဒီန် ဘည်လူလှဲဝ်ဟာဝ်း ပလိုႈ ဂါင်ပေန်ခ္လမာ် မိူဝ်ႈအေ့”။
ဇူႈဒါ ခည်ကျံရ်အောဂ်ုတ် ဆငည်း 1 ရောတ် အဒိူဝ် ဆငည်း 13 နီန် ဂေါႇယာန်ပ်ုရ်တံပ်ကညာအာဏာဆီုက်ဇေဝ်ကဲ စြာင်းပ်ုန်ကစုဘိူန်းအူန်း ဖုင်ယဲဆျှိုည်ဖီမျေ ပဆဖော၊ မာဝ်းႎံင်း ကာည်း မိုဂူႈနီန် တိုအီးအရာပ်ကဲ ယံမ်းဟာဝ်း 18 အီးအောႏ။
ခေဲင်လံပ်တီုက်နာန်း 1027 ဘံန်ဟောည်ႇထိင် TNLA ကဲကာည်း တံပ်ကပိုမ်ကဲတ ကီုင်းနော်င်ခေဝ်နီန် လှေင်ဘြည် 1ဆန်ုမ်လေႈ ခည်ကျံရ်ဇူန်လည် ဆငည်း 16ဒိူန် ကဲဟည်ဘ်ုပ် ပ္လေႈႎီရ်ဘိုးတတည်း တံပ်ကညာအာဏာဆီုက်ဇေဝ်ကဲအောႏ။
ဘံန်က္လိုတ်ႎီရ်းကဲဒါႇနောင်ခေဝ်နီန် တံပ်ကညာအာဏာဆီုက်ဇေဝ်ကဲ ထိုးလီပ်ဟာဝ်း ကဒါႇမိုဂူႈပအရာပ်ထိင်ခြဲ တံပ်ဆီုက်တအာင်း TNLA ကဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
