ပို့လဘား၊ ဩဂုတ် ၅ ရက်
တနင်္သာရီတိုင်း မြိတ်- ထားဝယ်ခရိုင်အတွင်းရှိ ဝင်းဝကျေးရွာက ဒေသခံတစ်ဦးကို စစ်တပ်က ပစ်သတ်ခဲ့တယ်လို့ KNUက ဒီနေ့ ဩဂုတ် ၅ ရက်မှာ ထုတ်ပြန်ထားပါတယ်။
ပြီးခဲ့တဲ့ ဩဂုတ်လ ၃ ရက် ည၁၀ နာရီဝန်းကျင်မှာ ဝင်းဝကျေးရွာဘက်ကို စစ်တပ်က ဝင်ရောက်လာတာဖြစ်ပြီး အဲဒီကျေးရွာက ဒေသခံတွေကို စစ်ဆေးမေးမြန်းရာမှာ အသက် ၅၈ နှစ်အရွယ်ရှိတဲ့ ဦးသန်းစိုးကို စစ်တပ်က ပစ်သတ်ခဲ့တာ ဖြစ်တယ်လို့ ဆိုပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “အဲဒီနယ်မြေမှာရှိတဲ့ စကစတပ်တွေက သူတို့စခန်းကိုကွပ်ကဲတဲ့ ဗိုလ်ကြီးအဆင့်၂ ယောက်က မဆက်သွယ်ဘဲ ကျနော်တို့တပ်မဟာ၄ ဆီ ထွက်ပြေးလာကြတယ်။ အဲဟာနဲ့ပတ်သက်ပြီး စစ်ကောင်စီဘက်က သူတို့လုပ်လေ့လုပ်ထရှိတဲ့ဟာ ရွာသားတွေကိုပဲ သူတို့တုံ့ပြန်မှာလေ။ အခုဖြစ်တဲ့ကိစ္စကလည်း အဲဒီရွာမှာဖြစ်တာဆိုတော့ သူတို့ကရွာသားတွေကိုရိုက်နှက်တာတွေပဲရှိမယ်။ ပစ်သတ်တာပဲရှိမယ် လူထုတွေပဲ နစ်နာတယ်။ အဲလိုပဲ ခဏခဏဖြစ်နေတယ်”လို့ ပြောပါတယ်။
ဝင်းဝကျေးရွာအပြင် တခြားရွာဖြစ်တဲ့ ဒေသခံတွေကိုလည်း စစ်တပ်က ၎င်းတို့ရဲ့ တပ်စခန်းကို ဖမ်းဆီးခေါ်ဆောင်သွားပြီး မနက် ၁ နာရီဝန်းကျင်မှာ ပြန်လွှတ်ပေးခဲ့တယ်လို့ ပြောပါတယ်။
ပြီးခဲ့တဲ့ ဩဂုတ် ၃ ရက်က စစ်တပ်ရဲ့ ခလရ တပ်ရင်း (၄၀၃) ဝင်းဝတပ်စခန်းကနေ ထွက်ပြေးလာခဲ့တဲ့ တပ်သား ၂ ဦးကို စစ်တပ်ဘက်က လိုက်လံဖမ်းဆီးနေတာတွေ ပြုလုပ်နေတာ ဖြစ်တယ်လို့ ဆိုပါတယ်။
အဆိုပါ ထွက်ပြေးလာတဲ့ စစ်တပ်ရဲ့ တပ်သား ၂ ဦးဟာ မနေ့ ဩဂုတ် ၄ ရက်မှာ ကရင်တပ်မတော် KNU/KNLA တပ်မဟာ(၄) တပ်ရင်း(၁၃) တပ်ခွဲ(၂)ထံ လက်နက်နဲ့အတူ အလင်းဝင်လာတာ ဖြစ်ပါတယ်။
အဲဒီလက်နက်ခဲယမ်းနဲ့အတူ အလင်းဝင်လာတဲ့ တပ်သား၂ ဦးကို KNLA တပ်ရင်း ၁၂ တပ်ရင်းမှူး ဒုတိယဗိုလ်မှူးကြီးစောဒါးဒါးက ဂုဏ်ပြုဆုချီးမြှင့်ငွေ ကျပ်သိန်း ၄၀ စီ ဂုဏ်ပြုခဲ့တာဖြစ်ပြီး အဆိုပါတပ်သား ၂ ဦးကလည်း ဘက်ပြောင်းခိုလှုံနိုင်ရန်အတွက် ဆက်သွယ်ကူညီပေးခဲ့တဲ့တပ်သားမောင်ကျော်ကျော်ကိုလည်း ဆုချီးငွေ သိန်း ၂၀ ကျပ်ပေးအပ်ခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
