မိုင်းရူပ၊ သြဂုတ် ၅ ရက်၊ နောင်ချို
စစ်တပ်ဘက်က အင်အားအလုံးအရင်းနဲ့ ထိုးစစ်ဆင်တိုက်ခိုက်နေတာကြောင့် နောင်ချို- မိုးကုတ်လမ်းပိုင်းရှိ ကျေးရွာတွေမှာ စစ်ကောင်စီနဲ့ တအာင်းတပ်မတော်-TNLA အကြား တိုက်ပွဲဆက်လက်ပြင်းထန်နေတယ်လို့ ရှေ့တန်းသတင်းအရင်းအမြစ်တွေက ပြောပါတယ်။
တိုက်ပွဲတွေဟာ နောင်ချိုနဲ့ မိုးကုတ်လမ်းပေါ်ရှိ လွယ်ငင်း၊ နားမွန်း၊ ကြူကော်စတဲ့ ကျေးရွာတွေမှာ ဖြစ်ပွားနေပြီးစစ်တပ်ဘက်က လက်နက်ကြီးနဲ့ ဒရုန်းဗုံးတွေကို အများအပြားအသုံးပြုပြီး တိုက်ခိုက်နေတယ်လို့ ဆိုပါတယ်။
“နားနွဲ့ရွာဘက်အထိတော့ စစ်တပ်တွေရောက်နေပြီ။ လွယ်ငင်းရွာထဲ စစ်တပ်တွေမရောက်ဖို့ TNLA ဘက်လည်း ခုခံနေတယ်။ စစ်တပ်ဘက်က အင်အားအလုံးအရင်းနဲ့ ထိုးလာတယ်။ ဒရုန်းရော၊ ဟောင်ဝစ်ဇာရော အများကြီးပဲသုံးနေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
အရင်က စစ်တပ်ရဲ့ ရဲဘက်အကျဥ်းစခန်းရှိတဲ့ ဟိုခိုကျေးရွာကိုတော့ TNLA ဘက်က ဆက်လက်ထိန်းချုပ်ထားပြီး လက်ရှိတိုက်ပွဲဖြစ်ပွားနေတဲ့ လွယ်ငင်းကျေးရွာဟာ ဟိုခိုနဲ့ ၂ မိုင်ကျော်သာ ကွာဝေးတာ ဖြစ်ပါတယ်။
PSLF/TNLA ရဲ့ ပြောရေးဆိုခွင့်ရှိသူ လွေးယေဦးကတော့ စစ်တပ်ရဲ့ ထိုးစစ်ကို TNLA နဲ့ ပူးပေါင်းတပ်တွေက ခုခံကာကွယ်ဖို့ ပြင်ဆင်ထားတယ်လို့ ဒီနေ့ သြဂုတ် ၅ ရက်မှာ ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
“လက်ရှိ မိုးကုတ်က လေကြောင်းတိုက်ခိုက်မှု အခံရဆုံးပဲ။ အခုတိုက်ပွဲပြင်းပြင်းထန်ထန်ဖြစ်တာ မရှိသေးပေမယ့် ထိုးစစ်ဆင်လာရင်တော့ မိမိကိုယ်ကို ခုခံကာကွယ်ခွင့်အတွက် မဟာမိတ်တွေနဲ့ ပူးပေါင်းပြင်ဆင်ထားတယ်”
စစ်ကောင်စီထောက်ခံတဲ တယ်လီဂရမ်ချယ်နယ်တွေမှာတော့ နောင်ချိုမြို့နယ်ရှိ သံဘိုကျေးရွာအပါအဝင် လုတ်သပြေရွာနဲ့ သပြေဒိုးရွာကို စစ်တပ်ဘက်က မနေ့ သြဂုတ် ၄ ရက်မှာ သိမ်းပိုက်နိုင်ခဲ့တယ်လို့ ရေးသားဖော်ပြနေကြပါတယ်။
TNLA နဲ့ ပူးပေါင်းတပ်တွေ ထိန်းချုပ်ထားတဲ့ နောင်ချိုမြို့ကို ၁ နှစ်ကျော်အကြာ ပြီးခဲ့တဲ့ ဇူလိုင် ၁၆ ရက်မှာ စစ်တပ်ထံ ပြန်လည်လက်လွှတ်ခဲ့ရပြီးနောက် မိုးကုတ်ဘက်ကို စစ်တပ်က ပြန်လည်ထိုးစစ်ဆင်လာတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
