မာည်းရူပ၊ ကျံရ်အောဂ်ုတ် ဆငည်း 3၊ မာဝ်းႎံင်း
ဇိုချီုင်တောႈ ခနံန်စဝ်တဘ်ုတ် ရီမ်းပြောကျောင် နတ်စစ်လင်း အ်ုန်အီဂေါည် ပဇံင် (2) ကီုင်းမာဝ်းႎံင်း ဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲနီန် အ်ုန်ဟည်ငျားဖါ်ႈ ညဲ့မဴင် လကပံတ်ဟာဝ်းပွံတ် ဇိူင်အ်ုန် အူကဒါႇအောႏ။
ခည်ကျံရ်အောဂ်ုတ် ဆငည်း 2 ခိင်ဆံန် ကပံတ် 2နြီလေႈအူကဒည်ဒိူန် ခနံန် စဝ်နန္ဒ အ်ုန်အီဘိူန်းအဆာက်တော် 42ဆန်ုမ်နီန် ငျားဒေညဲ့မဴင် ဇိုချီုင်တောႈအ်ုန်တဘ်ုတ် ရီမ်းပြောကျောင်ဒီန်အောႏ။
တိုအီးဂေါည်ခေဲင်မာဝ်းႎံင်းနီန်အူအီး က္လာင်းတဆျှိုည်ဖီမျေဒါႈ “ခနံန်စဝ် ငျားဒေညဲ့မဴင် ခိင်တောႈအ်ုန်တဘ်ုတ် ရီမ်းပြောကျောင်ဒီန်။ ဇိူင်အ်ုန် ကဒါႇတံမ် ကတ်ုတ်ဟာဝ်းပွံတ်”
အ်ုန်ဆီုပ်ဒါႈဘိုး ကနာည်နံင်ဘယ်ဒေဆနံမ်းဒဲႈ တစဝ်နန္ဒနီန် ဟည်တိုန်းဟိုက်အ်ုန် ပယုင်ဆနံမ်ဒါင်း လာဆေဝ်ယာ့်အောႏ။
မိူဝ်ႈဘိုးတိုအီးခေဲင်မာဝ်းႎံင်းကဲအူအီး က္လာင်းဒါႈ ခေဲင်ပ္လေါည်ကတီုက်ကပဴင် ဆီမ်းကီုင်းမာဝ်းဒိူန် ခေဲင်ကျောင်နတ်စစ်လင်းနီန် အ်ုန်မိုႈဖါ်ႈ ဒီပ္လေႈတံပ်ကညာအာဏာဆီုက်ဇေဝ်ကဲတတံပ် မဴင်ကဇေန်နီးမာ် နံင်မိုႈလိူည် မဴင်ပ်ုန်တီႇအူန်းကဲယာ့်။
ခည်ကျံရ်မာချှ် ဆငည်း 7ဒိူန်မာ် ယိူဝ်ႇတကဲတိူဝ်ႈကနိုက် ပ္လေဘောမ် အ်ုန်အီညှံမ်အီပဒူႈဒိူန် ဟည်ပဒူႈဖါ်ႈ လယံမ်းတိုအီး 2အီးကာည်း ဘာတ် 4အီးအောႏ။
တောပ်ဘည်စြာင်းပ်ုန်ဘိူန်းအူန်း ဖုင်ယဲဆျှိုည်ဖီမျေ ဂေါႇလာက်နာက်အီဒါ့်ကီုတ်ကဲဒိူန် ဇူႈပွံတ်ကျံရ်ေႎှဲပ်ဘျူရီ ရောတ်ဘံင်ကျံရ် အောဂ်ုတ်နီန် တိုအီးရဝ် ဟည်ယံမ်း 2အီးကာည်း ဘာတ် 7အီးယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
