မြတ်နိုး၊ ဇန်နဝါရီ ၃ ရက်၊ ဗန်းမော်
ကချင်ပြည်နယ် ဗန်းမော်မြို့မှာ စစ်ကောင်စီတပ်နဲ့ ကချင်တပ်မတော်- KIA ပူးပါင်းတော်လှန်ရေး တပ်ဖွဲ့တို့အကြား ဒီရက်ပိုင်းမှာ နေ့တိုင်းနီးပါး တိုက်ပွဲ ပြင်းထန်နေကြောင်း ဒေသခံအပြင် KIA ရှေ့တန်းနဲ့ နီးစပ်သူတွေဆီက သိရပါတယ်။
“ဗန်းမော်မြို့ထဲ မီးလည်း လောင်နေဆဲပဲ။ နာရီစင်အနီးဝန်းကျင်နဲ့ ကားကြီးဝင်းဝန်းကျင် ဖြစ်မယ်။ တိုက်ပွဲက ပြင်းနေဆဲပဲ။ လေယာဉ်လည်း ဗုံး ဆက်တိုက် လာကြဲနေတယ်” လို့ ဒေသခံတစ်ဦးက ပြောပါတယ်။
မြို့ထဲ မီးလောင်နေတဲ့ အခြေအနေကိုတော့ မြစ်တစ်ဖက်ကမ်းကနေ လှမ်းမြင်နေရတယ်လို့ သူက ပြောပါတယ်။
တိုက်ပွဲ ပိုမို ပြင်းထန်လာတာကြောင့် ကယ်ဆယ်ရေး လုပ်နေတဲ့ ပရဟိတအဖွဲ့လည်း ကူညီကယ်ဆယ်ဖို့ ခက်လာတာ တွေ့ရတယ်လို့ ဆိုပါတယ်။
“မနေ့က ခလရ ၄၇ နား၊ ဝင်းလိုက်ဟိုတယ်၊ ရုံးကြီး၊ ဆေးရုံတွေဘက် တိုက်ပွဲ ပြင်းထန်တယ်” လို့ KIA ရှေ့တန်းနဲ့ နီးစပ်သူတစ်ဦးက ပြောပါတယ်။
စစ်တပ်ဘက်က မနေ့တစ်ရက်အတွင်း လေကြောင်းနဲ့ ဗုံး ၉ ကြိမ် ကြဲချတိုက်ခိုက်ခဲ့ပြီး ဒရုန်းနဲ့လည်း ပိုမိုတိုက်ခိုက်လာကာ တိုက်မြင့်တွေမှာတော့ စစ်ကောင်စီတပ်ဘက်က စနိုက်ဘာသမားလည်း ရှိနေသေးတယ်လို့ သူက ပြောပါတယ်။
မြို့ထဲက အခြေအနေ ဆိုးတဲ့ဘက်မှာ ဒေသခံလူထု အထိအခိုက် များပြီး သေဆုံးသွားသူရဲ့ အလောင်းကို မြေမြှုပ်ပေးမယ့်သူ မရှိဘူးလို့ ဒေသခံတွေက ပြောပါတယ်။
နှစ်သစ်ကူးနေ့မှာလည်း ခလရ ၄၇ အနီး၊ ရုံးကြီးဘက် တိုက်ပွဲ ပြင်းထန်ခဲ့ပြီး စစ်တပ်ဘက်က လေကြောင်းနဲ့ ၇ ကြိမ် ဗုံးကြဲ တိုက်ခိုက်ခဲ့သလို ဒီဇင်ဘာ ၃၁ ရက်မှာလည်း ဝင်းလိုက်ဟိုတယ်၊ သိမ်တော်ကြီးဝင်း၊ ၄ မိုင်ဘက်မှာ တိုက်ပွဲ ပြင်းထန်ခဲ့တယ်လို့ ဆိုပါတယ်။
လေကြောင်းကနေ ဗုံးကြဲ တိုက်ခိုက်မှုကြောင့် ဝင်းလိုက်ဟိုတယ်ဟာ ရစရာမရှိအောင် ပျက်စီးသွားပြီး သိမ်တော်ကြီးဘုရားဝန်းရှိ လေးထပ်ကျောင်းဆောင်နဲ့အနီးအနားရှိ အဆောက်အဦးလည်း ပျက်စီးသွားကြောင်း ဒေသခံတွေဆီက သိရပါတယ်။
