မာည်းရူပ၊ ကျံရ်ဇူန်လည် ဆငည်း 31၊ နော်င်ခေဝ်
ဖုင်ယဲဆျှိုည်ဖီမျေ တခေါရ်နံပ် ပကီုင်းနော်င်ခေဝ် အ်ုန်အီမိုႈဒီပ်ုန်ႎီရ်ဘိူန်း တံပ်ကညာအာဏာဆီုက်ဇေဝ်ကဲ တထိင်ခြဲနီန် ကဲဂီုည်တောပ်ဒေဘိဂါင် ဒါႈမိုႈ အ်ုန်ကဆီုဝ်ကဆဲင်တောပ် တံပ်ဆီုက်တအာင်း TNLA ကာည်း PDF ကဲအောႏ။
ဘည်တောပ်ကဲတဘိဂါင် တိုအီးခေဲင်အရာပ် မံင်ခ္လကဲဒိူန်မာ် တံပ်ကညာအာဏာဆီုက်ဇေဝ်ကဲ ဂီုည်တောပ်ဒေတိုည်း ဒါႈမိုႈကဲကဆီုဝ်ကဆဲင်တောပ် တံပ်လံပ်တီုက်ႎှီုန်းကဲအောႏ။
ကောန်အီပ်ုန် နော်င်ခေဝ် အ်ုန်အီနံပ်ဘည်မိုႈဘည်ဘာည်းနီန်အူအီး က္လာင်းတဆျှိုည်ဖီမျေဒါႈ “ဂါင်ကဲအီလေႈဇီုဝ်ကဲဒိူန် ကဲဟည်ဘိဒိုႇ။ ဂါင်မာ်ဘိ တိုအီးမာ်တိုည်း။ တိုအီးပ်ုန်နံပ်အောအူအီး အ်ုန်ကတူႈကဲတိုည်းဟာဝ်း ဒါႈမိုႈအ်ုန် ကဆဲင်တောပ် TNLAကဲ။ မောကံပ်ရောတ်ကဇေန်နီး ကဲညှံမ်ပ္လေႈႎီရ်စိအ်ုန်။”
တတယ်လီဂရမ်ချှံန်နယ် ကဲအီထာ့်ခါမ် တံပ်ကညာအာဏာဆီုက်ဇေဝ်ကဲဒိူန်မာ် ပ္လိူရ်ႈလေႈ ဘည်တောပ်ကဲတဘိ ဂါင်အီကဆီုဝ်ကဆဲင်တောပ် TNLAကာည်း PDFကဲ ခေဲင်ကီုင်းနော်င်ခေဝ်။
ခေဲင်ပ်ုန်တောပ် တံပ်ကညာအာဏာဆီုက်ဇေဝ်ကဲတဘိဒီန် ဆဲႈဒါႇဂါင်ဂေါည် ဆဴင်ခြီရ်မာ်တောပ် ဆာ်မိုႈထာန်ဘိကဲ ညှံမ်နံပ်စိအောႏ။
ဘည်ပြံတ်တံပ်ကညာအာဏာဆီုက်ဇေဝ်ကဲတဝါဒ ဒါႈမိုႈကဲဟည်ႎီရ်ရေဲန်ဇီုင်း လံပ်ႎီရ်ပျိူဝ်ႇယိူဝ်ႇ လံပ်ဘြောင်ချှာင်၊ လံပ်ခေါခါႇ၊ လံပ်ပိင်ငျာကဲနီန် ခေဲင်ကီုင်းနော်င်ခေဝ် အူကဒါႇမာ် ကဲဂီုည်တောပ်ဒေဘိဂါင် တောပ်ဒေတိုည်း တိုအီးခေဲင်အရာပ်ကဲအောႏ။
ဘံန်ဟောည်ႇထိင် TNLA ကဲကာည်း တံပ်ကပိုမ်ကဲတ ကီုင်းနော်င်ခေဝ်နီန် လှေင်ဘြည် 1ဆန်ုမ်လေႈ ခည်ကျံရ်ဇူန်လည် ဆငည်း 16ဒိူန် ကဲဟည်ဘ်ုပ် ပ္လေႈႎီရ်ဘိုးတတည်း တံပ်ကညာအာဏာဆီုက်ဇေဝ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
