ယာရူစိင်း၊ ဇန်နဝါရီ ၃ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် မူဆယ်မြို့ကနေ ၁ဝ၅ မိုင်ဘက် သွားလာဖို့အတွက် မြို့အထွက်မှာရှိတဲ့ စစ်တပ်ဂိတ်ထံ အိမ်စီးကားတစ်စီးကို အသွားအပြန်အတွက် ငွေ (၁၆ဝ,ဝဝဝ)ကျပ် ပေးနေရပါတယ်။
ပြီးခဲ့တဲ့ ၂ဝ၂၄ ဒီဇင်ဘာလကတည်းက ဆိုင်ကယ် အသွားအလာ ခွင့်ပြုပေးခဲ့ပြီး ဒီဇင်ဘာလ နောက်ဆုံးအပတ်မှာတော့ အိမ်စီးကား သွားလာခွင့် ပြုခဲ့တယ်လို့ မူဆယ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“မူဆယ်အဝင်မှာလည်း ပေးရတာဘဲ။ ခဏတုန်းက ဖြတ်သွားပြီး မနက်တုန်းကမှ ပိုက်ဆံ ပေးပြီးပြီပြောလဲ မရဘူး။ နောက်ထပ် ၈ သောင်း ပြန်ပေးရတယ်။ အဲလမ်း ဖြတ်သွားရဖို့ ၁ သိန်း ၆ သောင်းလောက် ပေးရတယ်။ ညှိနှိုင်းရခက်တယ် အဆင်မပြေဘူး။ နောက်ကျရင်တော့ မသိဘူးပေါ့။ အခုတလော ဘယ်သွားသွား စစ်ခွေးတွေက ပိုက်ဆံဘဲ တောင်းနေတာ စိတ်ပျက်စရာပါ”
လက်ရှိမှာတော့ အသုံးအဆောင်ပစ္စည်း တင်ဆောင်ခွင့် မတင်းကြပ်တော့ပေမဲ့ ဓာတ်ဆီ သယ်ယူခွင့်ကိုတော့ တင်းကြပ်ထားသေးတယ်လို့ နောက်ထပ် ဒေသခံ အမျိုးသားတစ်ဦး ပြောပါတယ်။
“ပိုက်ဆံရှိမှ ဖြတ်လို့ရတာပါနော်။ ပိုက်ဆံ ပေးလိုက်ရင် စကစတွေက စပယ်ရှယ် ကြိုဆိုပြီးသား။ စိတ်မပူနဲ့ ပိုက်ဆံဘဲ ပေးပေါ့နော်။ ကျနော် ဖြတ်သွားတဲ့အချိန်မှာလည်း ပိုက်ဆံ ပေးလိုက်တာနဲ့ လုံးဝကို အဆင်ပြေချောမွေ့နေရောဘဲဗျ။ အဲလိုပုံစံ လက်တွေ့မှာ ဖြစ်နေပါတယ်လို့ ကျနော် ပြောချင်ပါတယ်”
လက်ရှိအချိန်ထိ သွားလာခွင့်ကို တရားဝင် ခွင့်ပြုပေးထားတာမဟုတ်ဘဲ တချို့ရက်မှာတော့ သွားလာခွင့် ပိတ်ထားတတ်တယ်လို့လည်း သိရပါတယ်။
