နော်ဂျား၊ ဇူလိုင် ၂၂ ရက်၊ မူဆယ်
ရှမ်းမြောက် မူဆယ်မြို့ပေါ်ရှိ ပြည့်တန်ဆာရုံတွေကို ပြီးခဲ့တဲ့ ဇွန်လဆန်းက သက်ဆိုင်ရာ ဌာနဆိုင်ရာဝန်ထမ်းနဲ့ ခရိုင်၊ မြို့နယ်၊ မြို့မရဲတပ်ဖွဲ့က ခေါ်ယူသတိပေးမှု ပြုလုပ်ခဲ့ပြီးနောက်ပိုင်း ပြည့်တန်ဆာရုံအများစု ပိတ်သိမ်းခဲ့ကြောင်း သိရပါတယ်။
ပြီးခဲ့တဲ့ ဇူလိုင် ၁၀ ရက်မှာ စခန်းမှူး ဒုရဲမှူး နေယုဆန်းအပါအဝင် ခရိုင်နဲ့မြို့နယ်မှ ရဲအရာရှိတွေက ပြည့်တန်ဆာ(ခေါင်းဆောင်)တွေနဲ့ ညှိနိူင်းမှုတချို့ ပြုလုပ်ပြီး ဇူလိုင် ၁၅ ရက်မှာ ပြည်တန်ဆာရုံသစ် ရုံဟောင်းအားလုံးကို ပြန်လည် ဖွင့်လှစ်ခွင့် ပေးခဲ့တာပဲ ဖြစ်ပါတယ်။
ပြည့်တန်ဆာရုံတစ်ရုံရဲ့ ရုံအကြီးအသေးအလိုက် လစဉ်ကြေးကို ၂၅ သိန်းမှ သိန်း ၅၀ အထိ ထပ်မံ တိုးကောက်ခဲ့တာကြောင့် ရုံအသေး လစဉ်ကြေးဟာ ၄၅ သိန်းနဲ့ ရုံအကြီးရဲ့ လစဉ်ကြေးက သိန်း ၆၀ အထိ ဖြစ်သွားကြောင်း ကောင်းမူးတုန် ရပ်ကွက်အုပ်ချုပ်ရေးမှူးရဲ့ အိမ်အနီးရှိ ပြည့်တန်ဆာရုံပိုင်ရှင်တစ်ဦးရဲ့ ပြောပြချက်အရ သိရပါတယ်။
ကားလေးဝန်းအနီး ရွှေဆင်မင်းအရှေ့လမ်းကြားရှိ တာမိုးညဲ ပြည်သူ့စစ်ခေါင်းဆောင် အိုက်မျိုးက တာဝန်ခံပြီး ဖွင့်လှစ်ထားတဲ့ ပြည့်တန်ဆာရုံကနေ ထွက်ပြေးသွားတဲ့ မိန်းကလေးနှစ်ဦးလည်း ပွဲစားတွေရဲ့ ညှိနှိုင်းမှုနဲ့ ပြန်လည် ရောက်ရှိလာပြီး အလုပ် လုပ်ဖို့ ငြင်းဆိုရင် ရိုက်နှက်ခံရတာရှိကြောင်း သွားရောက် ပျော်ပါးသူတွေဆီက သိရပါတယ်။
“သမီးတို့က ဧည့်သည်ကို ကြိုက်ကြိုက် မကြိုက်ကြိုက် ဖော်ဖော်ရွေရွေ ဆက်ဆံနေရတာ။ အရမ်းယုတ်မာတဲ့သူတွေကိုလည်း ပြန်မပြောရဲဘူး။ ကလန်ကဆန် လုပ်မိရင် သမီးတို့(ခေါင်း)က ရိုက်တယ်။ လစာထဲကလည်း ငွေဖြတ်တယ်” လို့ စွမ်စောရပ်ကွက် (၁)လမ်းရှိ ပြည့်တန်ဆာရုံမှ မိန်းကလေးငယ်တစ်ဦးက ရွှေဖီမြေကို ပြောပါတယ်။
မူဆယ်မြို့မရဲစခန်းမှူး ဒုရဲမှူး နေယုဆန်းက တာဝန်ယူ ဖွင့်လှစ်ထားတဲ့ ပြည့်တန်ဆာရုံ ၁၈ ရုံကတော့ ပိတ်ရက်မရှိ ဖွင့်နေရတာကြောင့် ပြည့်တန်ဆာရုံပိုင်ရှင်အများစုနဲ့ ခေါင်းဆောင်တွေက စခန်းမှူးနဲ့ ပူးပေါင်းဖွင့်လှစ်ဖို့ ကမ်းလှမ်းမှုတချို့ ရှိနေကြောင်းလည်း ရဲသတင်းအရင်းအမြစ်တွေဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
