ယာရူစိင်၊ ဇူလိုင် ၂၂ ရက်၊ တာချီလိတ်
ရှမ်းအရှေ့ တာချီလိတ်မြို့မှာ လေပြင်း တိုက်ခတ်တာကြောင့် သစ်ပင် ကျိုးကျရာကနေ မီးကြိုး ပြတ်ပြီး ဓာတ်လိုက်လို့ ၂ ဦး ဒဏ်ရာ ရရှိခဲ့တယ်လို့ တာချီလိတ်မြို့ခံတစ်ဦးက ရွှေဖီမြေကို ပြောပါတယ်။
“ဝီဖာ”မုန်တိုင်း အဖျားခတ်မှုကြောင့် မနေ့ ဇူလိုင် ၂၁ ရက်မှာ တာချီလိတ်မြို့ ရန်အောင်မြေရပ်ကွက်ရှိ လွှမ်းမိုး ဘုန်းကြီးကျောင်းရှေ့ လမ်းမပေါ်မှာ သစ်ပင် ကျိုးကျလို့ မီးကြိုးပြတ်ပြီး ဓာတ်လိုက်ခံခဲ့ရတာပဲ ဖြစ်ပါတယ်။
တာချီလိတ်မြို့ခံတစ်ဦးက “ဒဏ်ရာ ရတာက အမျိုးသား ၂ ဦးပေါ့။ မနေ့ကတော့ လေတိုက်တာ ပြင်းတယ်။ လေတိုက်တာက နာရီပိုင်းလောက်တောင် မရှိဘူး။ လေလည်းတိုက် မိုးလည်း နည်းနည်း ကျတာပေါ့။ အဓိကတော့ “ဝီဖာ”မုန်တိုင်းကြောင့်ပေါ့။ တာချီလိတ်မှာက မကြာခဏ ဖြစ်နေတာပဲ။ ဓာတ်လိုက်ခံရတဲ့ ၂ ယောက်က ဆိုင်ကယ် စီးနေချိန် ဖြစ်လို့ပါ” ဆိုပြီး ပြောပါတယ်။
ပြီးခဲ့တဲ့ ဇူလိုင် ၁၆ ရက်ကလည်း မိုးအဆက်မပြတ် ရွာသွန်းခဲ့ရာ တာချီလိတ်မြို့ ညဈေးတန်းရှိ ဆိုင်ခန်းအပေါ် ကုက္ကိုလ်ပင်တစ်ပင် လဲကျခဲ့တာကြောင့် အမျိုးသမီး ၂ ဦးနဲ့ အမျိုးသား ၂ ဦး ဒဏ်ရာ ရရှိခဲ့ပါတယ်။
တာချီလိတ်မြို့မှာ ရေကြီးရေလျှံမှုနဲ့ ရေထဲ မျှောပါပြီး သေဆုံးတာတွေလည်း မကြာခဏ ဖြစ်ပွားနေပါတယ်။
ပြီးခဲ့တဲ့ မေလ ၂၅ ရက်ကလည်း မိုးအဆက်မပြတ် ရွာသွန်းမှုကြောင့် မယ်ဆိုင်ချောင်းမှာ အမျိုးသား ၁ ဦး ရေထဲ မျှောပါပြီး သေဆုံးတဲ့ဖြစ်စဉ် ဖြစ်ပွားခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
