ပိုႈလဘား၊ ဇူန်လည် ဆငည်း 19၊ မူစယ်
တိုအီးအရာပ်ကဲ က္လာင်းဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတ ထိင်ခြဲ ကပီုန်ဆျှံမ်ကဒါႇပိူည် ပကီုးမူစယ်နီန် ကဲဂည်ယိူဝ်းဘိုး တိုပိုင်းခန္ဓာယံမ်းအောႏ။
တိုအီးအရာပ်မူစယ် ကောန်အီမာည်းအူအီးက္လာင်းတဖုင်ဆျှိုည်ဖီမျေဒါႈ အမှိူဝ် ကျံဇူန်လည် ဆငည်း 18 ဒိူန် ပမူစယ် အရာပ်ဟိုနား ခနား ဇံင်ကောင်းမှုတုံ ကာည်း မန့်မိုင်နီန် ကဲယိူဝ်းဘိုး တိုပိုင်ခန္ဓာယံမ်း အီအာဝ်မိူဝ်ႈကညာနီန် အူအီးအောႏ။
ကဲဒါႈ “ ဘည်ယိူဝ်းတ အယ်တိူရ်ႈတိုပိုင်းခန္ဓယံမ်းဒီန် အ်ုန်အာဝ်မိုႈစိ ကညာဖိင်။ ပရမောင်အ်ုန်မိုႈဒို, ဘာန်ႎံရ်။ တိုပိုင်းခန္ဓာအ်ုန်မာ် ဟည်အံမ်း။ ခေဲင်တိုပိုင်းအ်ုန်မာ် ဟည်မိုႈဒိုည်ႇႎါႇ”
ဖုင်အီကဇောည်ဒဲႈ တိုပိုင်းခံန္ဓာယံမ်းဒီန်မိုႈ ဖုင်လက်ဖက်ညွန့် ကာည်း ဖုင်မြင့်မြတ်ပါရမီ အ်ုန်အီဂေါည်ပမူစယ်နီန်အောႏ။
ခည်ကျံရ်ဇူန်လည် ဆငည်း 12 ဒိူန် ပကီုင်းမူစယ် ခေဲင်ဇံင်ဟိုနား ပကောင်ညိူဝ်နီန် ကဲယိူဝ်းအူန်းဘိုးတိုပိုင်းခန္ဓယံမ်းအူအီးအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
