ပိုႈလဘား၊ ကျံရ်ဇူန်လည် ဆငည်း 18၊ လာဆေဝ်
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ တောပ်ဒေတိုည်းကောန်တဘိုက် ကဲအီခေဲင်ဇံင် ကီုင်းလာဆေဝ် အ်ုန်အီမိုႈ ဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်အောႏ။
“တံင်ဒါင်းအ်ုန် ကဲတောပ်ဒေတိုည်း အီကဆီုဝ်ကဆဲင်တောပ် TNLA ကာည်း PDF ကဲ။ ဆာ်ကဲဘိူန်းဖါ်ႈဆဒါင် ကဲဒေဲႈတိုည်းပွံတ် ခေဲင်ဂါင်ခေဲင်ဆဴင်။ မှိူဝ်အာည်ႇဒိူန်မာ် ကဲဒါႈကဲဘိူန်းဆဒါင် မိူဝ်ႈ PDF ကဲလီပ်ဟြီုက်ပွံတ်ခေဲင်ဂါင်။ မိုႈလိူည် ကောန်တဘိုက်ကဲဒီန် ဟည်ရောတ်စာ်မ်းကဒါႇ တေင်နီ။ ကဲအာဝ်တံန်းတိုည်းစိ”
ဆဲႈဒါႇဒီန် ခည်ကျံရ်ဇူန်လည် ဆငည်း 15ဒိူန်မာ် ကောန်တဘိုက်ကဲအီအံက် ပဆဴင်ကာႎှီ ခေဲင်ကီုင်းလာဆေဝ်နီန် 3အီးမာ် တံပ်ကညာအာဏာဆီုက်ဇေဝ်ကဲ ဟည်လီပ်တိုည်းဟာဝ်းကဲအောႏ။
“ကဲလီပ်တိုည်းဟာဝ်း ကောန်တဘိုက် 3အီး ကဲအီအံက်တျံင် ကာႎှီဒီန် ဒီမှောကဲတိုည်းဟာဝ်းမာ် အာဝ်နံပ်စိ။ ကောန်တဘိုက် 3အီးကဲဒီန်မိုႈ ကောန်တအာင်း။ ခိင်နီန် ကောန်တဘိုက်ကဲ လိုခည်းအူန်းဆဒိဒါင်းဒါင်း။ လိုဆဒိ ဟာဝ်းဟာဝ်းႎီရ်ႎီရ်”
ဂေါႇပ်ုန်လီပ်ကမိုန်ခယ် ဘံန်ဟောည်ႇ ဆဖောကနာည်နံင်ဇံင်းဒါ့် လံပ်ကတီုက်ကပဴင် ခနားတံပ်ကညာအာဏာဆီုက်ဇေဝ်ကဲကာည်း MNDAA ကဲ တံပ်ကိုးကာင်းနီန် ဟည်လည်လေႈဟာဝ်းဖါ်ႈ ဒါႇကီုင်းလာဆေဝ် ခည်ကျံရ်အေပ်ြုရ် ဆငည်း 21ဒိူန် တံပ်ကညာအာဏာဆီုက်ဇေဝ်ကဲ စီလီပ်ကပါ်ႇလာ် လံပ်ဘြောင်ချှာင်ကဲအောႏ။
ကီုင်းလာဆေဝ် အ်ုန်အီမိုႈ ဒီဂေါည်တီုင်ကပ္လိူင်ဆီုက် လံပ်လေႈဆာင်ငည်း ကဒါႇပိူည် တံပ်ကညာအာဏာဆီုက်ဇေဝ်ကဲနီန် တံပ်ကိုးကာင်းကာည်း တံပ်ကပိုမ်ကဲ တီုက်ဘိူန်းဖါ်ႈ ခည်ဆန်ုမ် 2024 ကျံရ်အောဂ်ုတ် ဆငည်း 3ဒိူန် ဘံန်ဟောည်ႇလှေင်ဘြည် 8ကျံရ် ဂေါႇပ်ုန်တက်ုတ်ခယ် ဟည်ဘ်ုပ်အာပ်ႎီရ်ဘိုး တတည်းတံပ်ကညာအာဏာဆီုက်ဇေဝ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
