ပို့လဘား၊ ဇူလိုင် ၁၈ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ လားရှိုးမြို့မှာ စစ်ကောင်စီတပ်က မြို့ပေါ်ရပ်ကွက်တစ်ချို့မှာရှိတဲ့ လူငယ်တွေကို လိုက်လံစစ်ဆေးဖမ်းဆီးနေတာတွေ ပြုလုပ်နေတယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“သူတို့က TNLA နဲ့ပတ်သက်တဲ့လူနဲ့ PDF နဲ့ပတ်သက်တဲ့သူတွေကို အဓိကထားပြီးဖမ်းတယ်။ သတင်းရရင် အိမ်ထဲ၊ဆိုင်ထဲမှာ ဝင်ဖမ်းကြတယ်။ ဟိုတစ်ညလည်း PDF ရှိလို့ သတင်းရတယ်ဆိုပြီး အိမ်ထဲဝင်ရှာကြတယ်။ ဒါပေမယ့် အဲဒီလူငယ်တွေက သိန္နီဘက်ရောက်သွားတာ။ သူတို့မဖမ်းမိလိုက်ဘူး”
ဒါ့အပြင် ပြီးခဲ့တဲ့ ဇူလိုင်လ ၁၅ ရက်ကလည်း လားရှိုးမြို့ပေါ်ရှိ လက်ဖက်ရည်ဆိုင်တစ်ခုမှာ ထိုင်နေတဲ့ လူငယ်၃ ဦးကိုလည်း စစ်ကောင်စီတပ်က ဝင်ရောက်ဖမ်းဆီးသွားခဲ့တယ်လို့ ပြောပါတယ်။
“လက်ဖက်ရည်ထိုင်သောက်နေတဲ့ လူငယ်၃ ယောက်ကို သူတို့ဝင်ဖမ်းတာ ဘယ်ကိုခေါ်သွားမှန်းလည်း မသိဘူး။ အဲဒီလူငယ်၃ ယောက်က တအာင်းလူမျိုးတွေဖြစ်တယ်။ ဒီချိန်မှာ လူငယ်တွေသတိထားသင့်တယ်။ သွားသွားလာလာ ဆင်ခြင်သင့်တယ်”လို့ ဆိုပါတယ်။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက်က ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက်လည်ပတ်နေပါတယ်။
စစ်ကောင်စီရဲ့ အရှေ့ပိုင်းမြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို ကိုးကန့်တပ်နဲ့ တော်လှန်ရေးတပ်တွေက ပူပေါင်းပြီး ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်မှာ တိုက်ခိုက်သိမ်းပိုက်ထားပြီး ၈ လကြာအကျော်မှာ တရုတ်ဖိအားတဲ့ စစ်ကောင်စီကို ပြန်လည်လွှဲပြောင်းပေးခဲ့ရတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
