မိုင်းအရှိုင်း၊ ဇူလိုင် ၁၇ ရက်၊ ကျောက်မဲ
PSLF/TNLA ထိန်းချုပ်ထားတဲ့ ကျောက်မဲမြို့ကို စစ်ကောင်စီတပ်က လေကြောင်းကနေ ဗုံးအဆက်မပြတ် ကြဲချခဲ့ပြီးနောက်ပိုင်း လက်ဖက်ဝယ်သူ မရှိဖြစ်လာနေတယ်လို့ လက်ဖက်တောင်သူတွေက ရွှေဖီမြေကို ပြောပါတယ်။
ကျောက်မဲက လက်ဖက်လုပ်ကိုင်သူတစ်ဦးက “လက်ဖက် လာဝယ်တဲ့သူတွေမရှိတော့ဘူး။ အခုက လက်ဖက်ရုံတော်တော်များများလည်းပိတ်ပြီ။ ရောင်းစရာနေရာလည်း မရှိတော့ဘူး။ လက်ဖက်ကုန်သည်တွေက ဗုံးကြဲကတည်းက မန္တလေးတို့ အခြားနေရာ ရှောင်သွားကြပြီ” လို့ ဆိုပါတယ်။
ကျောက်မဲမြို့ကို စစ်ကောင်စီတပ်က ပြီးခဲ့တဲ့ ဇွန်လ ၂၄ ရက်က လူစည်ကားရာ စံပြထမင်းဆိုင်ကို လေကြောင်းကနေ စတင်ဗုံးကြဲတိုက်ခိုက်မှုကြောင့် ဒေသခံတွေ အပြင်မထွက်ရဲကြတော့သလို နေရပ်ကနေ တိမ်းရှောင်ပြီး မြို့တွင်းကဆိုင်တချို့ ပိတ်ထားကြရပါတယ်။
“တစ်လလောက်တော့ရှိပြီ လာဝယ်တဲ့သူတွေမရှိတော့ဘူး။ မန္တလေးတို့ဘာတို့လည်း သွားလို့မရတော့ဘူး။ ဝယ်နေကြရုံတွေကလည်း ရှောင်သွားပြီ”လို့ နောက်ထပ် လက်ဖက်လုပ်ကိုင်သူတစ်ဦးက ပြောပါတယ်။
ကျောက်မဲမြို့က လက်ဖက်ပွဲရုံတွေဟာ ကျောက်မဲနယ်က လက်ဖက်လုပ်ကိုင်သူတွေအပြင် အခြားမြို့နယ်က လက်ဖက်လုပ်ကိုင်သူတွေအတွက် လက်ဖက်ရောင်းဝယ်ဖောက်ကားရာ မြို့တစ်မြို့ဖြစ်ပါတယ်။
လက်ရှိချိန်မှာတော့ ကျောက်မဲမြို့မှာရှိတဲ့ လက်ဖက်ကုန်သည်တွေဟာ စစ်ကောင်စီတပ်ရဲ့ လေကြောင်းတိုက်ခိုက်မှုဆက်တိုက်ပြုလုပ်ပြီးတဲ့နောက်ပိုင်းမှာ တိမ်းရှောင်နေတာကြောင့် လက်ဖက်တောင်သူတွေ လက်ဖက်ရောင်းမရတဲ့ အခြေအနေကို ရောက်ရှိလာတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
