မိုင်းရူပ၊ ဇူလိုင် ၁၃ ရက်၊ နောင်ချို
စစ်ကောင်စီတပ်ဘက်က ထိုးစစ်ဆင်တိုက်ခိုက်နေတာကြောင့် တအာင်းတပ်မတော်-TNLA ထိန်းချုပ်ထားတဲ့ နောင်ချိုမြို့အနီးရှိ ကျေးရွာ ၃ ခုမှာ တိုက်ပွဲဆက်လက်ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
ဒီနေ့ ဇူလိုင် ၁၃ ရက်မှာ နောင်ချိုမြို့အနီးရှိ ကုန်းစံ၊ ကျောက်တောနဲ့ ကျောက်ကြမ်းစတဲ့ ကျေးရွာတွေမှာ စစ်ကောင်စီတပ်နဲ့ TNLA အကြား တိုက်ပွဲဆက်ပြင်းထန်နေတယ်လို့ ဆိုပါတယ်။
“စစ်ကောင်စီတွေ မြို့ထဲမရောက်သေးဘူး။ ဒီနေ့က ကုန်းစံ၊ ကျောက်တော၊ ကျောက်ကြမ်းဘက်မှာ ဖြစ်နေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ဒါ့အပြင် စစ်ကောင်စီးစစ်ကြောင်းဟာ နောင်ချိုမြို့အနီးရှိ ဂုတ်ထိပ်တံတားအထိ ရောက်ရှိလာပြီဆိုတဲ့သတင်းတွေ ထွက်ပေါ်နေပြီး ရှေ့တန်းစစ်မြေပြင်မှာ ရှိနေသူတွေကတော့ စစ်ကောင်စီစစ်ကြောင်းဟာ ဂုတ်ထိပ်တံတားအနီးထိ ရောက်ရှိလာတာမရှိဘူးလို့ ရွှေဖီမြေကို ပြောပါတယ်။
စစ်ကောင်စီတပ်ဟာ ၎င်းတို့လက်လွတ်ခဲ့ရတဲ့နောင်ချိုမြို့ကို ပြန်ရဖို့ စစ်ကြောင်း ၂ ကြောင်းခွဲပြီး စစ်အင်အားထောင်နဲ့ချီအသုံးပြုကာ ၅ လနီးပါး ထိုးစစ်ဆင်တိုက်ခိုက်နေပေမဲ့ TNLA နဲ့ ပူးပေါင်းတပ်တွေရဲ့ တန်ပြန်တိုက်ခိုက်မှုတွေကြောင့် နောင်ချိုမြို့ကို ထိန်းချုပ်နိုင်ခြင်း မရှိသေးပါဘူး။
တအာင်းတပ်ဘက်ကလည်း နောင်ချိုမြို့နယ်ရှိ ရွှေပြည်ညွန့် ၊ ကျောက်ပြုတ်နှင့် ကုန်းစံကျေးရွာမှာ စစ်ကောင်စီတပ်နဲ့ TNLA အကြား တိုက်ပွဲဆက်လက်ဖြစ်ပွားနေပြီး စစ်ကောင်စီဘက်က လက်နက်ကြီး (၁၆၉)လုံး၊ ဒရုန်းဗုံး (၅၄)လုံးနဲ့ လေကြောင်းနဲ့ ဗုံး (၆)လုံးအသုံးပြုပြီး တိုက်ခိုက်ခဲ့တယ်လို့ မနေ့ ဇူလိုင် ၁၂ ရက်မှာ ထုတ်ပြန်ထားပါတယ်။
နောင်ချိုတိုက်ပွဲကြောင့် မြို့ပေါ်ရှိ ဒေသခံတွေနဲ့ မြို့အနီးရှိ နေထိုင်သူတွေ စစ်ဘေးရှောင်နေကြတယ်လို့ ဒေသခံတွေက ပြောပါတယ်။
ပြီးခဲ့တဲ့ ဇူလိုင် ၁၁ရက်နေ့တုန်းက နောင်ချိုမြို့ စျေးရပ်ကွက်ကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် နေအိမ် ၆လုံးထက်မနည်း ထိခိုက်ပျက်စီးခဲ့ပါတယ်။
TNLAနဲ့ပူးပေါင်းတပ်တို့ နောင်ချိုမြို့အခြေစိုက် စစ်ကောင်စီရဲ့ အမှတ်(၆၀၆) ဒုံးတပ်ရင်းအပါအဝင် ခြေမြန်တပ်ရင်း-၁၁၄၊ ခမရ- ၁၁၅ တို့ကို ၂ ပတ်ကြာ တိုက်ခိုက်သိမ်း ပိုက်ပြီး နောင်ချိုမြို့ကို ပြီးခဲ့တဲ့ ၂၀၂၄ ခုနှစ် ဇူလိုင် ၁၀ ရက်မှာ ထိန်းချုပ်နိုင်ခဲ့တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
