ယာရူစိင်၊ ဇူလိုင် ၁၃ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ လားရှိုးမြို့မှာ နွားတင်တဲ့ကားသမားတွေထံ စစ်တပ်က ငွေသိန်းရာချီ တောင်းနေသလို ငွေမပေးသူတွေကို ထောင် ၆ လချမှတ်နေတာတွေရှိနေတယ်လို့ ဒေသခံတွေထံက စုံစမ်းသိရပါတယ်။
လားရှိုး-သိန္နီအထွက် အေဒီတံတားနဲ့ နမ္မတူ-လားရှိုးအဝင်ဂိတ်နေရာတွေမှာသာ အဓိကထားပြီး နွားတင်ကားသမားတွေထံ ငွေသိန်းရာချီ တောင်းနေတာလို့ မျက်မြင်တွေ့ရှိသူ တစ်ဦးက ရွှေဖီမြေကို ပြောပါတယ်။
“အဲနေ့က နမ္မတူ-လားရှိုးအဝင်မှာ ကျနော် အဲဒီနွားတင်တဲ့ကားနောက် တန်းစီရတော့လေ။ ကျန်တဲ့ကားတွေတော့ အကြာကြီးမရပ်ရဘူး။ မလွှတ်တာဆိုလို့ အဲနွားတင်တဲ့ကားပဲ ရှိတယ်”
စစ်ကောင်စီတပ်သားတွေဟာ နွားတင်ကားသမားတွေထံ အနည်းဆုံး ငွေ သိန်း ၁၀၀ကနေ ငွေ သိန်း ၃၀၀ အထိ တောင်းနေပြီး ငွေးပေးနိုင်တဲ့ကားသမားတွေတော့ စစ်တပ်က ထောင်ဒဏ်မချဘူးလို့ အထက်ပါသတင်းအရင်းအမြစ်က ပြောပါတယ်။
နွားတင်ဖို့အတွက်ကို လားရှိုးမြို့ရှိ သက်ဆိုင်ရာဌာနတွေထံ အကြောင်းကြားပြီးမှသာ နွားတင်ခွင့်ရတယ်လို့ နောက်ထပ်ဒေသခံတစ်ဦး ပြောပါတယ်။
“ဘယ်ဌာနကို တိုင်းကြားထားတာလည်းပေါ့။ အကြောင်းမကြားပဲ နွားတင်လာရင်တော့ ပိုက်ဆံကောက်တယ်လေ။ မပေးရင် ထောင်ဒဏ် ၆ လအပါအဝင် ချတယ်ပေါ့။ အကြောင်းကြားပြီး အခွန်ဆောင်ပြီး တင်လာရင်တော့ သိပ်ပြဿနာမရှိပါဘူး”
ပြီးခဲ့တဲ့ ဇူလိုင် ၁ ရက်နေ့ကလည်း ကွတ်ခိုင်မြို့ကနေ လားရှိုးဘက်ဆင်းတဲ့ ကုန်ကားတစ်စီးကို အေတီတံတားမှာ လုံခြုံရေးတာဝန်ယူနေတဲ့ စစ်ကောင်စီတပ်သားတွေဟာ ကုန်ကားသမားထံ ငွေ ၁၅ သိန်းထက်မနည်း တောင်းခဲ့ကြောင်း ကိုယ်တိုင်ကြုံတွေ့သူတွေက ရွှေဖီမြေကို ပြောပါတယ်။
လားရှိုး-နမ္မတူလမ်းခွဲမှာလည်း ဖြတ်သန်းသွားလာတဲ့ ကုန်ကားသမားတွေဆီကနေ စစ်တပ်က ငွေ ၅ သောင်းကနေ သိန်းချီအထိ တောင်းခံတယ်လို့ ဒေသခံတွေရဲ့ ပြောပြချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
