ယာရူစိင်၊ ဇူလိုင် ၈ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့ရှိ ရွှေဆိုင် ၁ ဆိုင် ဓားပြတိုက်ခံရပြီး ငွေ သိန်း ၂၀၀ နဲ့ ရွှေ ၇၅ ကျပ်သားပါသွားခဲ့တယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇူလိုင် ၄ ရက်က လားရှိုးမြို့ ရပ်ကွက် ၉ မှာ ဘူတာသံလမ်းအနီးရှိ ရွှေဆိုင် ၁ ဆိုင်ကို လူတစ်စုက ဝင်ရောက်ဓားပြတိုက်ခဲ့ပါတယ်။
“ဓားပြတိုက်ခံရတာက ဘူတာနားလေးက ရွှေဆိုင်တစ်ဆိုင်ပေါ့။ ဆိုင်ဖွင့်ဖို့ လုပ်နေချိန်မှာ ကားအမဲနဲ့ စီးလားတဲ့ လူတစ်စုက ဓားပြတိုက်သွားတာ။ ဆိုင်ရှင်ရဲ့ ရွှေတွေပါသွားတာက နည်းတယ်။ အဓိကတော့ သူများရဲ့ အပ်ထည်တွေ ပိုပါသွားတာ။ အဲကြောင့် ရွှေက ၇၅ ကျပ်သားဖြစ်သွားတာ”
လားရှိုးမြို့ပေါ်ကို စစ်ကောင်စီပြန်လည်ထိန်းချုပ်ပြီးတဲ့နောက်မှာ သူခိုး၊ ဓားပြနဲ့ မီးကြိုး သူခိုးတွေအပါအဝင် စစ်တပ်က ဖမ်းဆီးမိတာတွေ သိပ်မရှိဖူးဘူးလို့ ဒေသခံတွေဆီက သိရပါတယ်။
ပြီးခဲ့တဲ့ ဇွန်လ ၁၈ ရက်ကလည်း လားရှိုးမြို့ ရပ်ကွက် ၄ ဆင်ဆွယ်လမ်း လမ်းသွယ် ၄ မှာ ကတ်ကြေးနဲ့ ခြိမ်းခြောက်ပြီး အမျိုးသမီးတစ်ဦးထံ ဖုန်းလုတဲ့ အမျိုးသားတစ်ဦးကို ဒေသခံတွေကဘဲ ဝိုင်းဝန်းပြီး ဖမ်းဆီးရမိထားခဲ့ပါတယ်။
ဇွန်လ ၁၇ ရက်ကလဲ လားရှိုးမြို့ ရပ်ကွက် ၃ မှာရှိတဲ့ အကင်စုံဆိုင်နားမှာ ဆိုင်ကယ်ခိုးတဲ့ အမျိုးသားတစ်ဦးကို ဒေသခံတွေက ထပ်မံဝိုင်းဝန်းဖမ်းဆီးရမိထားပါတယ်။
လားရှိုးမြို့ကို စစ်တပ်က ဝင်ရောက်ပြီးနောက် ပြီးခဲ့တဲ့ ဧပြီ ၂၂ ရက်ကနေ ဒီနေ့ ဇွန်လ ၁၂ ရက်အထိ ဓားပြတိုက်မှု၊ ဓားခုတ်မှုနဲ့ လုယက်မှု အကြိမ် ၃၀ ထက်မနည်း ဖြစ်ပွါးခဲ့ပြီ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
