ယာရူစိင်၊ ဇူလိုင် ၅ ရက်၊ သီပေါ
PSLF/TNLA ထိန်းချုပ်ထားတဲ့ သီပေါမြို့ကို မနေ့ ဇူလိုင် ၄ ရက် ည ၁၀ နာရီမှာ စစ်ကောင်စီတပ်က ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချတိုက်ခိုက်ခဲ့တာကြောင့် နေအိမ်တချို့ ထိခိုက်ပျက်စီးသွားခဲ့တယ်လို့ ဒေသခံတွေက ရွှေဖီမြေကို ပြောပါတယ်။
သီပေါမြို့ ပြည်သူ့ဆေးရုံကြီးရဲ့ ခွဲစိတ်ဆောင်နဲ့ နမ့်ပေါ့တံတားအနီးရှိ စိုက်ပျိုးရေးရုံးကို ပစ်မှတ်ထားပြီး ဗုံးကြဲတိုက်ခိုက်ခဲ့တာဖြစ်ပြီး ဗုံးအရှိန်ကြောင့် အနီးအနားရှိ နေအိမ် ၈ လုံးထက်မနည်း ထိမှန်ပျက်စီးခဲ့ပါတယ်။
“လူအထိအခိုက်တော့ မရှိဘူး။ ဗုံးအရှိန်ပြင်းလို့ အိမ်က မျက်နှာကျက်တွေ အကုန်ပြုတ်ကျတယ်။ တချို့အိမ်ဆို နေမရအောင် ပျက်သွားတယ်။ ဆေးရုံဘက်မှာတော့ နေအိမ်တွေ သိပ်မထိဘူး။ အဓိကတော့ ခွဲစိတ်ဆောင်ပဲ ရစရာမရှိတော့တာ။ စိုက်ပျိုးရေးရုံးဘက်မှာပဲ ဆိုးတာ”
ဗုံးကြဲတိုက်ခိုက်မှုကြောင့် စိုက်ပျိုးရေးရုံးရှိ အစိုးရအဆောက်အဦးက ၅ လုံး ပျက်စီးသွားခဲ့တယ်လို့ သီပေါမြို့အခြေအနေသိရှိသူ တစ်ဦးက ပြောပါတယ်။
ပြီးခဲ့တဲ့ ဇွန်လ ၂၄ ရက်ကနေ ၂၉ ရက်အထိ တစ်ပတ်အတွင်း ကျောက်မဲမြို့ကို စစ်ကောင်စီတပ်က လေကြောင်းကနေ တိုက်ခိုက်ခဲ့တာကြောင့် ဒေသခံ ၅ ဦးသေဆုံးပြီး ၂၂ ဦး ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
