မာည်းရူပ၊ ကျံရ်ဇူန်လည် ဆငည်း 2၊ နောင်ခေဝ်
ကဝ်အီဂေါည်ခေဲင်ပ္လေါည်ကတီုက်ပဴင်နီန် က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ဆီုက်တအာင်း TNLA ကဲတထိင်ခြဲ ပကီုင်းနောင်ခေဝ်နီန် တံပ်ကညာအာဏာဆီုက်ဇေဝ်ကဲအီရောတ် ရီမ်းပြောမျက်ချင်းနုနီန် ကဲဟည်ထိုးလီပ်ဒေဲႈတီုက်ဟာဝ်းဘိုး ကနာည်နံင်ဘိူန်းကဲတ တံပ်ဒါင်းဒုံး(606)နီန်။
ခည်ကျံရ်ဇူန် ဆငည်း 30 ဒိူန် တံပ်ကညာအာဏာဆီုက်ဇေဝ်ကဲ ဟည်ရောတ်ဖါ်ႈပရဝ်မျက်ချင်းနုနီန် ကနာည်နံင်ဘိူန်းကဲတ တံပ်ဒါင်းဒုံး (606) အ်ုန်အီကဒိုင်းတောပ် ရဝ်မျက်ချင်းနုနီန် ကပံတ် 2 မဲင်မာ် ကဲဟည်ထိုးလီပ်ဒေဲႈတီုက်ဟာဝ်းဘိုးအောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန် အူအီး က္လာင်းတဖုင်ဆျှိုည်ဖီမျေဒါႈ “ ဆကဆကဲ ရီန်းဒေလီပ် ခေဲင်တံပ် 606 နီန်။ ကဇေန်နီး ကဲဆီုင်ဂီုည်ဂေါည်လိူည် ပရဝ် မျက်ချင်းနု”။
အ်ုန်ဆီုပ်ဒါႈဘိုး အမှိူဝ် ကျံရ်ဇူန်လည် ဆငည်း 1 စူန်အံပ်ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲပျောႈဟာဝ်းဘျုင် 2 လိူဝ်ႈ ဒီပဲန်ကရဲင် ပ္လေါည်ကတီုက်ကပဴင် ပရဝ်မျက်ချင်းနုနီန်အောႏ။
ဖုင်ယဲဆျှိုည်ဖီမျေ တခေါရ်နံပ် တံပ်ကညာအာဏာဆီုက်ဇေဝ် ကဲအီထိုးဒေဲႈ ကဒါႇရဝ်အုမ္မတီးနီန် ဆီုက်ငါႇကဲ ဟည်ရောတ်ဘိုး ပရဝ်အုမ္မခါးအောႏ။
တံပ်ကညာအာဏာဆီုက်ဇေဝ်ကဲ ကနာည်နံင်ႎီရ်ဘိူန်းကဲတလာ်ထိင်ခြဲ ကီုင်းနောင်ခေဝ်နီန် ဒါပွံတ်ရဲင်ဘ္လောမ်ဒါဟြဲင်လေႈ ထိုးလီပ်ဒေဲႈဖါ်ႈ ကဒါႇတံပ်ဆီုက်တအာင်း TNLA ကဲမာ် ကနာည်နံင်အာဝ်ဇောႈကီုင်းနောင်ခေဝ်နီန် ဟည်ႎီရ်တီုက်ဟာဝ်းဘိုးအောႏ။
တံပ်ကပိုမ် ကာည်း တံပ် TNLA ကဲ တီုက်ဘိူန်းဟာဝ်း တောပ်ပည် တံပ်အ်ုန်အီမိုႈ တံပ်ဒါင်းဒုံး စနဲ (606)နီန် ကာည်း တံပ်ခမရ -114 နီန် ဟောည်ႇဒီန် စီတီုက်ဘိူန်းဟာဝ်းလာ် ကီုင်းနောင်ခေဝ်နီန် ခည်ဆန်ုမ် 2024 ကျံရ်ဇူန်လည် ဆငည်း 10 ဒိူန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
