မာည်းအဆျှဴင်၊ ကျံရ်ဇူန် ဆငည်း 29၊ မာဝ်းဝံင်း
ဂေါႇဘျုင်ပ်ုန်ပျောႈတံပ်ကညာအာဏာဆီုက်ဇေဝ်ကဲ ခေဲင်ကီုင်းမာဝ်းႎံင်း ကပီုန်ဆျှံမ်ကဒါႇပိူည်နီန် တိုအီး 5 အီး ကတူႈဖေးဘာတ်ဟာဝ်းဖါ်ႈ ကျောင်(ရှမ်းကျောင်ကြီး) ကာည်း ဂါင်ဂေါည်မာ် လူလှဲဝ်ႏဂီုန်းအောႏ။
ကဝ်အီနံပ် ဘည်မိုႈဘည်ဘာည်းနီန် အူအီး က္လာင်းတဖုင်ဆျှိုည်ဖီမျေဒါႈ “ တောပ်ပည် ဆဲင်ႎှုင် လဒိုည်ႇ ဂါင်အ်ုန်အီဂေါည် ရီမ်းပြောကျောင်(ရှမ်းကျောင်းကြီး)ဒီန်။ ဂါင်အူဂါင် အ်ုန်လူလှဲဝ်ႏကံပ်အာဝ်ဆေ။ ကဲဟံရ် မိုႈလိူည်ဂေါႇရဲင်ဘ္လောမ်အ်ုန်စီလ”
ဘည်ပ်ုန်ပ္လိူရ်ႈလေႈ တံပ်ဆီုက်တအာင်း TNLA ကဲဒါႈ ဂေါႇဘျုင်နီန်ဒီဘြေ့အ်ုန် ဂါင်လူလှဲဝ်ႏဟာဝ်း 10 ကြောင်လေႈအောႏ။
ဖုင်ကဇောည်အ်ုန်အီဂေါည်ပမာဝ်းႎံင်းကဲ အူအီးက္လာင်းတဖုင်ဆျှိုည်ဖီမျေဒါႈ “ ကဲအီကတူႈဖေးမိုႈ ကောန်အီမာည်း အာရ်အီး ကာည်း ကောန်အီပ်ုန် အ်ုန်အီဘိူန်း အဆာက်ကပံတ် 20 ဆန်ုမ် ကဲအီဂေါည် ခေဲင်ဆဴင်ႎှုင်ကဲ 3 အီး။ ယဲတိုန်းအူန်းကဲ ကနာည်နံင်ရံပ်ခါမ်ဘည်ဆနံမ်းနီန် ပဂါင်ဆနံမ် ”
အမှိူဝ် ကျံရ်ဇူန် ဆငည်း 29 ဘံန်ဆံန် 2 နြီလေႈ 30 မနေတ်ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းဘျုင် ပေါင် 500 ပမာဝ်းႎံင်း ဒီဘိူန်းတံပ်ဆီုက်တအာင်းကဲတထိင်ခြဲနီန်အောႏ။
ခေဲင်အူနှားနီန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဒေဲႈပျောႈဟာဝ်းဘျုင် ပမာဝ်းႎံင်း 4 လိူဝ်ႈ တိုအီးအရာပ်ကဲ 5 အီးယံမ်းဟာဝ်းဖါ်ႈ 21 အီး ကတူႈဖေးဘာတ်ဟာဝ်းအောႏ။
ခည်ကျံရ်ဇူန် ဆငည်း 26 ဒိူန်မာ် တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းဘျုင် ဒီဘိူန်းတံပ်ဆီုက်တအာင်း TNLA ကဲတထိင်ခြဲ ပကီုင်းမိုဂူႈနီန် တောပ်ပည်ကောန်ဒဲႇအူအီး 4 အီးကတူႈဖေးဘာတ်ဟာဝ်းအောႏ။
တံပ်ကညာအာဏာဆီုက်ဇေဝ်ကဲ ကနာည်နံင်ႎီရ်ဘိူန်းကဲတလာ်ထိင်ခြဲ ကီုင်းနောင်ခေဝ် ပ်ုန်ထိင်ခြဲအူန်း တံပ်ဆီုက်တအာင်း TNLA ကဲ ဒါပွံတ်ရဲင်ဘ္လောမ်ဒါဟြဲင်လေႈ ထိုးလီပ်ဒေဲႈဖါ်; ဒါဘိုးယာန်ပ်ုန်ဒေဲ;ပျော;ဟာဝ်းဘျုင်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
