မိုင်းရူပ၊ ဇွန်လ ၃၀ ရက်၊ နောင်ချို
တအာင်းတပ်မတော် PSLF/TNLA ထိန်းချုပ်ထားတဲ့ နောင်ချိုမြို့ပေါ်ကို စစ်ကောင်စီတပ်က ပေါင် ၅၀၀ ဗုံးအသုံးပြုပြီး ကြဲချတိုက်ခိုက်ခဲ့တဲ့အပြင် ဟောင်ဝစ်ဇာလက်နက်ကြီးနဲ့ပါ ပစ်ခတ်နေတယ်လို့ ရွှေဖီမြေက စုံစမ်းသိရှိရပါတယ်။
မနေ့ ဇွန်လ ၂၉ ရက် ည ၁၀ နာရီဝန်းကျင်မှာလည်း နောင်ချိုမြို့ စျေးရပ်ကွက်ထဲကို ဂျက်လေယာဥ်နဲ့ ပေါင် ၅၀၀ ဗုံး ၂ လုံး အသုံးပြုပြီး ဗုံးကြဲတိုက်ခိုက်ခဲ့ရာ နေအိမ်တချို့ ထိခိုက်ပျက်စီးခဲ့ပါတယ်။
ဒါ့အပြင် မနေ့ည ၁၁ နာရီဝန်းကျင်ကစပြီး နောင်ချိုမြို့ထဲကို စစ်ကောင်စီတပ်က လက်နက်ကြီးနဲ့ ပစ်ခတ်တိုက်ခိုက်ခဲ့ရာ ဒီနေ့ ဇွန်လ ၃၀ ရက် မနက်ပိုင်းအထိ နောင်ချိုမြို့ထဲကို လက်နက်ကြီးနဲ့ ပစ်ခတ်နေတယ်လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
“ည ၁၀ နာရီ ၂၂ မိနစ်မှာ ပေါင် ၅၀၀ ဗုံး ၂ လုံးနဲ့ လာကြဲတယ်။ လူအထိအခိုက်တော့ မရှိဘူး။ နေအိမ်ပျက်တာတော့ ရှိတယ်။ ဟောင်ဝစ်ဇာနဲ့လည်း ဆက်တိုက်ပစ်နေတယ်။ ဒီနေ့ မနက်အထိပဲ” လို့ ဆိုပါတယ်။
စစ်ကောင်စီတပ်ဟာ ၎င်းတို့လက်လွှတ်ထားရတဲ့ နောင်ချိုမြို့ကို ပြန်ရဖို့ စစ်အင်အားထောင်နဲ့ချီ အသုံးပြုပြီး ထိုးစစ်တိုက်ခိုက်နေပြီး နောင်ချိုမြို့အနီးမှာ စစ်ကောင်စီတပ်နဲ့ TNLA အကြား တိုက်ပွဲပြင်းထန်နေပါတယ်။
ဒီရက်ပိုင်းအတွင်း နောင်ချိုမြို့အနီးရှိ နောင်အောနဲ့ မြက်ချီးနုကျေးရွာတွေမှာ စစ်ကောင်စီနဲ့ TNLA အကြား တိုက်ပွဲပြင်းထန်နေတယ်လို့ သိရပါတယ်။
နောင်ချိုမြို့အနီးက တိုက်ပွဲတွေကြောင့် ထောင်နဲ့ချီတဲ့ ဒေသခံတွေ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဒေသခံတွေက ရွှေဖီမြေကို ပြောပါတယ်။
ဒါ့အပြင် တအာင်းတပ်ထိန်းချုပ်ထားတဲ့ ကျောက်မဲမြို့ပေါ်ကိုလည်း စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်တာတွေ ပြုလုပ်နေပြီး မနေ့ ဇွန်လ ၂၉ ရက်က ကျောက်မဲမြို့ပေါ် လေကြောင်းတိုက်ခိုက်မှုမှာ အရပ်သား ၅ ဦးထိ ခိုက်ဒဏ်ရာရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
