ယာရူစိင်၊ ဇွန်လ ၂၀ ရက်၊ လားရှိုး
စစ်ကောင်စီ ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့မှာ လိုင်စင်မဲ့ ကားတွေကို ရှောင်တခင် ဖမ်းဆီးနေတာတွေ ရှိနေတယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
လားရှိုးမြို့အထွက် နမ္မတူလမ်းခွဲမှာ လိုင်စင်မဲ့ ကားတွေကို စစ်တပ်က ဖမ်းဆီးပြီး ပြန်ရွေးခွင့် မပေးလို့ ဒေသခံတွေ အခက်တွေ့နေရတယ်လို့ ဆိုပါတယ်။
“ကံမကောင်းတဲ့လူဆိုရင်တော့ အဖမ်းခံရတယ်ပေါ့။ နမ္မတူလမ်းခွဲနားမှာ ဖမ်းတာတွေ့တယ်။ သူတို့က ဖမ်းချင်တဲ့စိတ်ပါမှ ဖမ်းတာပါ။ သူတို့စိတ်မပါရင် မဖမ်းဘူးနော်။ ပြန်ရွေးခွင့် မပေးဘူးလို့ ပြောတယ်။ အဲလိုကျ အဆင်မပြေဘူးလေနော်။ ဘာဆက်ဖြစ်မလဲ မသိတော့ဘူး” လို့ လားရှိုးမြို့ခံတစ်ဦးက ပြောပါတယ်။
လားရှိုးမြို့ထဲရှိ အဓိက လမ်းမတွေမှာ လိုင်စင်မဲ့ ကားတွေကို စစ်တပ်က ရှောင်တခင်အနေနဲ့သာ ဖမ်းဆီးနေတာ ဖြစ်တယ်လို့ နောက်ထပ် လားရှိုးမြို့ခံတစ်ဦးက ပြောပါတယ်။
“အစုလိုက် မဖမ်းတာဘဲ ရှိတာ။ သတင်းတွေ ပွလာမှာဆိုးလို့ပေါ့။ သူတို့ မထင်ရင် မထင်သလို ထလုပ်လို့ရတယ်ဆိုတဲ့ပုံစံမျိုးပေါ့။ ဆိုင်ကယ် ဖမ်းတာတော့ မတွေ့ရသေးဘူး”
တန့်ယန်းမြို့မှာလည်း စစ်တပ်က လိုင်စင်မဲ့ကားနဲ့ ဆိုင်ကယ်ကို ပြီးခဲ့တဲ့ ဇွန်လ ၁၈ ရက်မှာ စတင်ဖမ်းဆီးနေကြောင်း ဒေသခံတွေက ရွှေဖီမြေကို ပြောဆိုထားပါတယ်။
မေလ နောက်ဆုံးအပတ်ကစပြီး ရှမ်းတောင် တောင်ကြီး၊ အောင်ပန်း၊ ပင်းတယနဲ့ ဆီဆိုင်မြို့မှာလည်း လိုင်စင်မဲ့ကားနဲ့ ဆိုင်ကယ်ကို စစ်ကောင်စီက ဆက်တိုက် ဖမ်းဆီးမှု ပြုလုပ်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
