လွေးထွေး၊ ဇွန်လ ၁၆ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့မှာ ရပ်ကွက်တိုင်းက အသက်ပြည့်ပြီးသား အမျိုးသမီးတွေကိုပါ စစ်မှုထမ်းဖို့ ဆင့်ခေါ်စာနဲ့ အတင်းခေါ်နေတယ်လို့ ပြင်ဦးလွင်ရှိ အမျိုးသမီးတစ်ဦးရဲ့ ပြောပြချက်အရ သိရပါတယ်။
ဆင့်ခေါ်စာတွေကို ဇွန်လ ၁၄ ရက်ကစပြီး လိုက်ပေးနေဖြစ်ပြီးတော့ ဇွန်လ လကုန်နောက်ဆုံး သတ်မှတ်ရေးသားထားသလို အသက် ၁၈ နှစ်ပြည့်ပြီးသူ အမျိုးသမီးတိုင်း သတ်မှတ်ထားတဲ့ ရုံးဆီသို့ လာရောက်အကြောင်းကြားဖို့ ရေးသားထားပါတယ်။
ပြင်ဦးလွင်ရှိ အမျိုးသမီးတစ်ဦးက “ဒီမှာက စစ်မှုထမ်းခေါ်တာတို့ ဖမ်းတာတို့ကတော့ ဖြစ်နေတာ ကြာပြီ။ ဒါပေမဲ့ အမျိုးသမီး စစ်မှုထမ်းကတော့ ဒီတစ်ရက်နှစ်ရက်မှာ ခေါ်တာပေါ့။ တော်တော်များများ သတင်းပေးမထွက်ကြဘူး။ ဒီမြို့က အစိမ်းအားပေးမြို့ဆိုတော့လေ” လို့ ပြောပါတယ်။
လူငယ်အမျိုးသားတွေကို စစ်မှုထမ်း စာရင်းခေါ်တာကြောင့်နဲ့ အမျိုးသမီးတွေကိုပါ စစ်မှုထမ်းခေါ်နေတာကြောင့် တချို့မိသားစုက ပြောင်းရွှေ့ကြဖို့ကိုပါ ပြင်ဆင်နေကြကြောင်း ၎င်းအမျိုးသမီးက ဆိုပါတယ်။
ပြီးခဲ့တဲ့ ဇွန်လ ၁၁ ရက်ကလည်း ပြင်ဦးလွင် ရပ်ကွက်ကြီး (၈) နဲ့ လက်ပန်ကုန်းရွာက လူငယ်အမျိုးသား (၇) ဦး ကိုလည်း စစ်ကောင်စီတပ်က စစ်မှုထမ်းဖို့ ဖမ်းခေါ်ခဲ့ပါတယ်။
အလားတူ စစ်ကောင်စီတပ်ဟာ နေပြည်တော်၊ ရန်ကုန်၊ မန္တလေး၊ ရှမ်းတောင်စတဲ့နေရာမှာ စစ်မှုထမ်း အပတ်စဉ် (၁၄) အတွက် သတ်မှတ်ထားတဲ့ လူဦးရေပြည့်ဖို့ အမျိုးသား၊ အမျိုးသမီး မခွဲခြားဘဲ အပူတပြင်း နည်းမျိုးစုံနဲ့ ခေါ်ယူစုဆောင်းနေတာကို တွေ့နေရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
