မိုင်းရူပ၊ ဇွန်လ ၅ ရက်၊ နောင်ချို
နောင်ချိုမြို့အနီး ရောက်ရှိလာတဲ့ စစ်ကောင်စီတပ် စစ်ကြောင်းဟာ တအာင်းတပ်မတော်- TNLA ရဲ့ တပ်စခန်းကို ဆက်လက် ထိုးစစ်ဆင် တိုက်ခိုက်နေပြီး ဒီနေ့ ဇွန်လ ၅ ရက်မှာ ကံကြီးရွာထဲ တိုက်ပွဲ ပြင်းထန်နေပါတယ်။
စစ်တပ်ဟာ ရွှေမုဌောရွာကနေ နောင်ချိုမြို့ထဲ လက်နက်ကြီးနဲ့ ပစ်ခတ်တိုက်ခိုက်နေပြီး မနေ့ ဇွန်လ ၄ ရက် နေ့လယ်ပိုင်းမှာ စစ်တပ်က ပစ်ခတ်တဲ့ လက်နက်ကြီးကြောင့် နောင်ချိုမြို့ ဈေးရပ်ကွက်ရှိ အမျိုးသမီး ၂ ဦးနဲ့ အမျိုးသား ၂ ဦး ထိခိုက်ဒဏ်ရာ ရခဲ့ပါတယ်။
တိုက်ပွဲဟာ နောင်ချိုမြို့အနီး ရောက်လာတာကြောင့် နောင်ချိုမြို့ခံနဲ့ နောင်ချိုမြို့အနီးရှိ ကံကြီး၊ ရွှေမုဌော၊ ရှောက်ခြုံနဲ့ နောင်လိတ် စတဲ့ကျေးရွာက ဒေသခံတွေဟာ ဘေးလွတ်ရာ ထွက်ပြေးတိမ်းရှောင်နေရတယ်လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
“စစ်ကောင်စီက ဆက်တိုက် ထိုးနေတာ။ ဒီနေ့လည်း ကံကြီးရွာထဲမှာ တိုက်ပွဲ ပြင်းထန်နေတယ်။ နောင်ချိုဒေသခံတွေက ကျောက်မဲဘက် ရှောင်တာ ရှိတယ်။ တချို့က နီးစပ်ရာ တိမ်းရှောင်ကြတယ်”
ဒဏ်ရာရတဲ့ ဒေသခံတွေဟာ ဦးမြင့်အောင်၊ ဒေါ်ထွေး၊ ဦးကျော်ဝင်းနဲ့ ဒေါ်မူမူအောင်ဖြစ်ပြီး စစ်တပ်ရဲ့ လက်နက်ကြီးကြောင့် နေအိမ်တွေလည်း ပျက်စီးခဲ့တယ်လို့ သူက ဆက်ပြောပါတယ်။
ကံကြီးရွာဟာ TNLA ထိန်းချုပ်ထားတဲ့ နောင်ချိုမြို့နဲ့ ၇ မိုင်ဝန်းကျင်လောက်သာ ကွာဝေးတော့တယ်လို့ သိရပါတယ်။
စစ်ကောင်စီကို ထောက်ခံတဲ့ တယ်လီဂရမ် ချန်နယ်တွေမှာတော့ ရှောက်ခြုံ၊ ရေဖြူနဲ့ ကံကြီးရွာရှိ TNLA တပ်စခန်းတွေကို မနေ့ ဇွန်လ ၃ ရက်မှာ သိမ်းပိုက်နိုင်ခဲ့တယ်လို့ ရေးသားဖော်ပြထားပါတယ်။
စစ်တပ်ဟာ ၎င်းတို့ လက်လွှတ်ထားရတဲ့ နောင်ချိုမြို့ကို ပြန်ရဖို့ တောင်းခမ်းနဲ့ အုမ္မတီးရွာဘက်ကနေ ထိုးစစ်ဆင် တိုက်ခိုက်နေဖြစ်ပြီး TNLA တပ်ဘက်ကလည်း ဆက်လက် ခုခံနေဆဲ ဖြစ်ပါတယ်။
နောင်ချိုမြို့ကို ပြီးခဲ့တဲ့ ၂၀၂၄ ခုနှစ် ဇူလိုင်လထဲ TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့တာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
