မိုင်းရူပ၊ ဇွန်လ ၅ ရက်၊ လားရှိုး
စစ်ကောင်စီတပ် ပြန်အုပ်ချုပ်နေတဲ့ ရှမ်းမြောက် လားရှိုးမြို့မှာ အခြေခံပညာသင်ကျောင်းတွေ စတင်ဖွင့်လှစ်ခဲ့ပြီး လုံခြုံရေး စိုးရိမ်ချက်ကြောင့် ကျောင်းတက်တဲ့ ကလေးဦးရေ လျော့ကျနေတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
လားရှိုးမြို့ပေါ်ရှိ ကျောင်းအားလုံးနီးပါးကို စစ်ကောင်စီက ပြီးခဲ့တဲ့ ဇွန်လ ၂ ရက်မှာ ဖွင့်လှစ်ခဲ့ရာ ကျောင်း လာတက်တဲ့ ကျောင်းသားကျောင်းသူ အရင်ကထက် လျော့နည်းလာတာ တွေ့ရတယ်လို့ ကျောင်းသားမိဘတစ်ဦးက ရွှေဖီမြေကို ပြောပါတယ်။
“တနင်္လာနေ့က စဖွင့်ပါပြီ။ အရင်ကလို မများပါဘူး။ အထက ၉ မှာဆို အရင်ရဲ့ ထက်ဝက်ကျော်ယုံလေးတင်ပဲ ရှိပါတယ်။ အဓိက စိုးရိမ်တာတော့ တိုက်ပွဲ ဖြစ်လာရင် ရှော့တိုက်ဒုံးတို့ လေကြောင်း စိုးရိမ်မိပါတယ်”
စစ်ကောင်စီရဲ့ ၂၀၂၃-၂၀၂၄ ပညာသင်နှစ်ရဲ့ စာရင်းအရ လားရှိုးမြို့နယ်ထဲ စာသင်ကျောင်းပေါင်း ၂၄၀ ကျော်ရှိပြီး လက်ရှိမှာ စစ်ကောင်စီက လားရှိုးမြို့ပေါ်ရှိ စာသင်ကျောင်း ၄၀ ကျော်သာ ဖွင့်လှစ်နိုင်တာ ဖြစ်ပါတယ်။
မြို့ပြင်ရှိ ကျေးရွာ ၂၀ မှာတော့ ကိုးကန့်တပ် ဦးဆောင်ပြီး စာသင်ကျောင်းတွေ ဖွင့်လှစ်သွားမယ်လို့ ထုတ်ပြန်ထားပါတယ်။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက်က ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်နေပါတယ်။
နိုင်ငံတဝန်းမှာ စစ်ကောင်စီရဲ့ စာသင်ကျောင်းတွေကို ပြီးခဲ့တဲ့ ဇွန်လ ၂ ရက်မှာ စတင်ဖွင့်လှစ်ခဲ့ပြီး ကျောင်းလာအပ်တဲ့ ကျောင်းသားကျောင်းသူဦးရေ ၆ သန်းကျော်(၆,၁၁၉,၂၆၀ ဦး)ရှိကြောင်း စစ်ကောင်စီရဲ့ ပညာရေးဝန်ကြီးဌာနက ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
