ယာရူစိင်၊ ကျံရ်မေ ဆငည်း 31၊ မာဝ်းႎံင်း
ကဝ်အီနံပ် ဘည်မိုႈဘည်ဘာည်းနီန်အူအီး က္လာင်းတဖုင်ဆျှိုည်ဖီမျေဒါႈ ပလှံင်မာဝ်းႎံင်း ခမိုတော့ဆန် ရဝ်ကမာည်းကုန်းသာ(ရဝ်ကဒေဲင်လဲင်)နီန် ကတာည်းဒီကိူဝ်ႈကဲတခြီရ်နီန် ပဲန်တက္လာႈ လဟာဝ်းကောန်အီမာည်းအူအီး ။
ခည်ကျံရ်မေ ဆငည်း 27 စူန်အံပ် 3 နြီလေႈ 30 မနေတ်ဒိူန် ပလှံင်မာဝ်းႎံင်း ရဝ်အီကဒံပ်တောပ် ရဝ်ကုန်းသာ ဒီကိူဝ်ႈကဲတခြီရ် ပရဝ်ဆန်ခမ်းနီန် ခိင်ရလှဲဝ်ကဲ ကတာည်း အ်ုန်အီဂေါည်ခီတေဲင်ကဲ တက္လာႈဇောႈဖါ်ႈစီလ ယံမ်းဟာဝ်းအ်ုန်အောႏ။
“ကဲဟာဝ်းကိူဝ်ႈတောန်ဆငည်း။ ကဲရလှဲဝ်လိူည်ဆငည်းဆဒါင်း။ ဒီကိူဝ်ႈကဲတခြီရ်ဒီန် ကညာ အီကိူဝ်ႈခြီရ်ကဲဒီန်မာ် ဟည်ကိူဝ်ႈဟောည်ႇ ဂါရ်စီတောပ်ဒေကိူဝ်ႈ ဒီကိူဝ်ႈဟောည်ႇ ကညာခြီရ်ကဲ။ ဂါရ်ဟည်ကိူဝ်ႈဟောည်ႇဖါ်ႈခြီရ် စီရလှဲဝ်။ ခိင်ရလှဲ၀်ကဲဒီန် ကတာည်းအီဂေါည်ခီတေဲင်ကဲစီ တက္လာႈဖါ်ႈ တက်ုတ်ဟာဝ်းအ်ုန်။ ခိင်တက္လာႈဒီန် ငျားဘိုး ခိင်ဟာဝ်း ဒ ဂေါအ်ုန်တအိုမ်။ ခိင်ႎီရ်ဒေဲႈ ဂေါအ်ုန်ဒီန် ကတာည်းကံပ်ဟည်တက်ုတ်ဒိုည်ႇအ်ုန်။ ကတာည်းအီဂေါည်ခီတေဲင်ဒီရလှဲဝ်ကဲ အ်ုန်တောပ်ဘိုးမာဝ်း ဇောႈတက်ုတ်ဖါ်ႈကိင်အ်ုန်ကံပ်ထညု။ ဇိူင်အ်ုန်ကာည်း တည်းအ်ုန်မာ် ဟည်ကတံတ်ဒိုည်ႇ အ်ုန်မာ်ယံမ်းဟာဝ်းပွံတ်ဒီဒီန်”
ကောန်အီမာည်း ကဝ်အီယံမ်းဟာဝ်း ဂေါႇကတာည်းတက်ုတ်ဒီန် အ်ုန်ဇီုဝ် တာကန်ဟိန်း(တာကွန်မိုလောဝ်) ဘိူန်းအဆာက် 55 ဆန်ုမ် အ်ုန်မိုႈတိုအီးရဝ်ကုန်းသာ လှံင်မာဝ်းႎံင်းအောႏ။
ကောန်အီမာည်းဒီန် အ်ုန်မိုႈအီရံပ်ဇီုင်းကာန်ကော်င်မတီခေဲင်ကျောင်စဝ်၊ တာဟိုမာဝ်၊ ဒီရေဲန်တဇီုင်းကာန်လှူနီန်မာ် အ်ုန်မိုႈတာကျောင်၊ ပကျောင်ပနောဘေဲႇမာ် အ်ုန်ရံပ်ဘိုးဇီုင်းကပ္လိူင်တာကော်င်မတီ ခေဲင်ရဝ်မာ်မိုႈဘိုး တိုအီးအီမိူဝ်ႈဇီုင်းကပ္လိူင်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
