မာည်းရူပ၊ ကျံရ်မေ ဆငည်း 28၊ နော်င်ခေဝ်
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ တံပ်ဆီုက်တအာင်း – TNLA အ်ုန်အီဂေါည်ပရဝ်ယာပြင် လှံင်နော်င်ခေဝ် ကပီုန်ဆျှံမ်ကဒါႇပိူည် ဒီပဲန်ဘ္လောမ်ပ္လေါည်ကတီုက်ကပဴင်နီန် ဟည်ချှူမ်ဟာဝ်းဘိုး တံပ် တကညာအာဏာဆီုက်ဇေဝ်ကဲ အူတံပ်အောႏ။
ဘံန်ဟောည်ႇဘိူန်း တံပ်ကညာအာဏာဆီုက်ဇေဝ်ကဲ တတံပ် TNLA အ်ုန်အီဂေါည် ပရဝ်သရက်ချိုနီန် ဘံန်ဟောည်ႇထိုးလီပ်ကဲ ခေဲင်တံပ် TNLA အ်ုန်အီဂေါည်ပရဝ်ယာပြင် ကဲဟည်ဘိူန်းဒေ ဆီမ်းလာည်း ခည်ကျံရ်မေ ဆငည်း 26ဒိူန်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ “မိုႈအေႇ ကညာအာဏာဆီုက်ဇေဝ်ကဲ ဟည်ႎီရ်ဘိူန်းဘိုး တံပ် TNLA အ်ုန်အီဂေါည်ပယာပြင်နီန်။ ကဲဘိူန်းဟာဝ်း ခည်ကျံရ်မေ ဆငည်း 26ဒိူန်။ ဆာ်မိုႈ ဆငည်း 27ဒိူန် အာဝ်မိူဝ်ႈစိ ပ္လေါည်ကတီုက်ကပဴင်။ ဆာ်မိုႈ ဘည်ပဴင်လာက်နာက်ဒါင်းကဲနီန် မိူဝ်ႈအေ့”
တံပ်ကညာအာဏာဆီုက်ဇေဝ်ကဲ ဟည်ဇူႈဖါ်ႈလာ်ဒါ တီုက်ယာႈကဒါႇ တော်င်ခံမ်းကာည်း အုမ္မတီး ကနာည်နံင်ႎီရ်ဘိူန်းဘိုး ကီုင်းနော်င်ခေဝ် အ်ုန်အီမိုႈ ပ်ုန်ချှူမ်ဟာဝ်းကဲဒိူန်၊ ကဒါႇတံပ်ဆီုက်တအာင်းကဲမာ် ဟည်ဘ်ုပ်က္လိုတ်ႎီရ်ဒါႇ တံပ်ပ်ုန်ထိင်ခြဲအူန်းကဲ မံင်ခ္လအောႏ။
ကဇေန်နီး ရဲင်ဘ္လောမ်ဆီုက် တံပ်ကညာအာဏာဆီုက်ဇေဝ်ကဲ ဂေါည်ဖါ်ႈပနော်င်လဲင်ႏ၊ ယာပြင်ကာည်း အုမ္မတီး အ်ုန်အီဂေါည်ရီမ်းကီုင်းနော်င်ခေဝ်၊ ယိူဝ်းဘိုးဘည်လီပ်တီုက်ယာႈ ကနာည်နှာင်းႎီရ်ဘိူန်း ကီုင်းနော်င်ခေဝ်နီန်အောႏ။
ခည်ကျံရ်မေ ဆငည်း 20ဒိူန်မာ် ဂေါႇမိုႈကဒါႇတံပ်ကညာအာဏာဆီုက်ဇေဝ်ကဲ လီပ်တီုက်ယာႈ စီပဲန် တံပ်ကညာအာဏာဆီုက်ဇေဝ်ကဲ ဟည်ႎီရ်ထိင်ခြဲဘိုး ဂေါင်ကော်င်မူး သရက်ချို အ်ုန်အီမိုႈပ်ုန်ထိင်ခြဲအူန်း TNLA ကဲနီန်အောႏ။
ကညာအာဏာဆီုက်ဇေဝ်ကဲ ဟည်ပ္လေႈအူန်းတံပ်ကဲ ပတီုင်ကပ္လိူင် စေတ်မေန်းတံပ်လာက်နာက်ဒါင်း 902 တံပ်ကညာအာဏာဆီုက်ဇေဝ်ကဲ အ်ုန်အီဂေါည်ပရဝ်တော်င်ခံမ်း တောပ်ဘိုး တံပ် 354၊ 206ကာည်း 406 အီမိုႈတံပ်လာက်နာက်ဒါင်းကဲနီန်အောႏ။
ဆာ်မိုႈကီုင်းနော်င်ခေဝ်နီန် အ်ုန်မိုႈ ကီုင်းပ်ုန်တီုက်ဘိူန်း TNLA ကာည်း တံပ်ကပိုမ်ကဲ ခည်ဆန်ုမ် 2024 ကျံရ်ဇူန်လည်ဒိူန်အောႏ။
ညှံမ်မိူဝ်ႈမ ဘည်ရိူရ်ႈလေႈ ကဒါႇတံပ်ဆီုက်တအာင်းကာည်း တံပ်ကညာအာဏာဆီုက်ဇေဝ်ကဲ တပ္လါႇဘေဲႇပဇံင်း အီကဆီုဝ်ကဆဴင်တောပ် ပ္လေါည်ကတီုက်ကပဴင် လှံင်နော်င်ခေဝ်နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
