မြတ်နိုး၊ မေ ၂၈ရက်
ကချင်ပြည်နယ်၊ မြစ်ကြီးနားခရိုင်၊ ဆော့လော်မြို့နယ်၊ လန်ဆယ်သွားတဲ့လမ်း စန်းကျာဟော် ဆိုတဲ့နေရာမှာ မနေ့ မေလ ၂၇ ရက်နေ့ မွန်းလွဲပိုင်း၂ နာရီခန့်က မိုးကြီးမြေပြိုလာလို့ ခရီးသွား အမျိုးသား တစ်ဦး သေဆုံးခဲ့ရကြောင်း ဒေသခံတွေဆီက သိရပါတယ်။
“လန်ဆယ်က ဆင်းလာတာ ကားလမ်းမှာ မြေပြိုလာလို့ ဆိုင်ကယ်တွန်း နေချိန် ကျောက်တုံးတစ်ခု ခေါင်းပေါ် ပြုတ်ကျ ထိမှန်လို့ သေဆုံးသွားတာ။” လို့ ဒေသခံ တစ်ဦးက ပြောပါတယ်။
သေဆုံးသွားတဲ့ အမျိုးသားဟာ ဝိုင်းမော်က အသက် ၃၀ ကျော်အရွယ် ဦးလွမ်းထောဆိုသူ ဖြစ်တယ်လို့ သူက ပြောပါတယ်။
“မနေ့ မွန်းလွဲပိုင်း ၂ နာရီလောက်က ဖြစ်တာ။ စန်းကျာဟော် အောက်နားမှာ ဖြစ်တာ။ အခုက ဒီမှာပဲ သင်္ဂြိုလ်နေပြီလို့ ပြောတယ်။ အဲဒီ နေရာမှာက ဖုန်းလိုင်း မရှိတော့ ဆက်သွယ်လို့ မရဘူး ဖြစ်နေတယ်။” လို့ နောက်ထပ် ဒေသခံ တစ်ဦးက ပြောပါတယ်။
သေဆုံးသွားသူရဲ့ မိသားစုဝင်တွေနဲ့ အဆက်အသွယ် ရပေမယ့် လမ်းပိတ်နေလို့ သွားမရဖြစ်နေတာကြောင့် အဲဒီ စန်းကျာဟော်ဒေသခံတွေကပဲ င်္သဂြိုလ်ပေးခဲ့ရတယ်လို့ ဆိုပါတယ်။
မိုးလေဝသနဲ့ ဇလဗေဒ ဦးစီးဌာနကတော့ မနေ့ မေလ ၂၇ ရက်နေ့ရော ဒီနေ့ မေလ ၂၈ ရက်နေ့မှာပါ နေရာအနှံ့အပြား မိုးထစ်ချုန်းရွာပြီး နေရာကွက် မိုးကြီးနိုင် ကြောင်း သတင်းထုတ်ပြန်ထားပါတယ်။
ရန်ကုန်တိုင်းဒေသကြီး၊ မကွေးတိုင်း ဒေသကြီး၊ စစ်ကိုင်းတိုင်းဒေသကြီးအထက်ပိုင်း၊ ဧရာဝတီတိုင်းဒေသကြီး၊ တနင်္သာရီတိုင်းဒေသ ကြီး၊ ကချင် ပြည်နယ်၊ ကရင်ပြည်နယ်၊ ချင်းပြည်နယ်နဲ့ မွန်ပြည်နယ် တွေမှာ နေရာကွက် မိုးကြီးနိုင်ပြီး ရွာရန်ရာနှုန်းပြည့် ဖြစ်ကြောင်းလည်း ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
