မြတ်နိုး၊ မေ ၂၈ရက်၊ ဖားကန့်
ဖားကန့်လမ်း ဆိုင်းဖရာရွာမှာ ပြီးခဲ့တဲ့ မေလ ၂၇ ရက်နေ့ ညနေပိုင်းက ကလေးငယ် ၂ ဦး လက်နက်ကြီးကျည် ကောက်ဆော့ရာက ပေါက်ကွဲမှုဖြစ်ပြီး သေဆုံးသွားခဲ့ကြောင်း ဒေသခံတွေဆီက စုံစမ်းသိရပါတယ်။
“ဆိုင်းဖရာရွာမှာ အိမ်ရှေ့နားမှာ ကလေး ၂ ယောက် လက်နက်ကြီးကျည် ကောက်ဆော့တာ ပေါက်ကွဲပြီး သေဆုံးသွားတယ်။ သူတို့၂ယောက်လုံးက ညီအစ်ကိုတွေပါ”လို့ ဒေသခံ တစ်ဦးက ပြောပါတယ်။
သေဆုံးသွားတဲ့ ကလေးငယ်နှစ်ဦးဟာ အသက် ၁၂ နှစ် အရွယ် နဲ့ ၁၀ နှစ်အရွယ်တွေ ဖြစ်ကြတယ်လို့ သူက ပြောပါတယ်။
“ကလေးတွေက မမြင်ဖူးတဲ့ အရာဆိုရင် သိချင်တယ်လေ။ အဲဒါကြောင့် ကောက်ကိုင်လိုက်တာနေမှာ။ စစ်ဖြစ်ဖူးတဲ့ နေရာဆိုရင် ကလေးမိဘတွေ ကလေးတွေကို ခဏခဏ ပြောပြသတိပေးရမယ်” လို့ နောက်ထပ် ဒေသခံ တစ်ဦးက ပြောပြပါတယ်။
ပြီးခဲ့တဲ့ မေလ ၈ ရက်နေ့က ကာမိုင်းကနေ ဖားကန့်ဘက် စစ်ကြောင်းထိုးလာတဲ့ စစ်ကောင်စီတပ်ဖွဲ့က ဆိုင်းဖရာရွာကို ဝင်ရောက်လာခဲ့ပြီးနောက် စစ်ကောက်စီတပ်ဖွဲ့နဲ့ KIA ပူးပေါင်း တပ်ဖွဲ့တို့အကြား အဲဒီ ဆိုင်းဖရာ နဲ့ ကပ်မှော်ရွာတစ်ဝိုက် ရက်အနည်းငယ်ကြာ တိုက်ပွဲဖြစ်ပွားခဲ့တာ ဖြစ်ပါတယ်။
ဒေသခံတွေကတော့ တိုက်ပွဲ ဖြစ်ပွားခဲ့တဲ့ နေရာဒေသတွေမှာ ပေါက်ကွဲနိုင်သေးတဲ့ စစ်ကျန် လက်နက် ပစ္စည်းတွေနဲ့ ပတ်သက်ပြီး အန္တရာယ် ကာကွယ်ရေး အသိပညာပေးတာတွေ များများ လိုအပ်နေကြောင်း ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
