မိုင်းရူပ၊ မေလ ၂၂ ရက်၊ နောင်ချို
စစ်ကောင်စီတပ်နဲ့ တအာင်းတပ် TNLA အကြား နေ့စဥ်တိုက်ပွဲဖြစ်နေတဲ့ ရှမ်းမြောက် နောင်ချိုမြို့နယ် အုမ္မတီးလမ်းခွဲမှာ စစ်ကောင်စီတပ်က ဂျက်လေယာဥ်နဲ့ ဗုံး ၄ လုံး ကြဲချတိုက်ခိုက်ခဲ့တယ်လို့ တအာင်းတပ်က ထုတ်ပြန်ပါတယ်။
ဒီနေ့ မေလ ၂၂ ရက် မနက် ၁၁ နာရီ ၅၀ မိနစ်မှာ အုမ္မတီးလမ်းခွဲကို ဂျက်လေယာဥ်နဲ့ ဗုံး ၄ လုံး ကြဲချတိုက်ခိုက်ခဲ့တာဖြစ်ပြီး ထိခိုက်မှုအခြေအနေကို ဆက်လက်စုံစမ်းနေဆဲလို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ရွှေဖီမြေကို ပြောပါတယ်။
ဧပြီလကုန်မှာ ပြုလုပ်တဲ့ တရုတ်နိုင်ငံ ကူမင်းဆွေးနွေးပွဲ ပျက်ပြီးနောက် စစ်ကောင်စီတပ်ဟာ TNLA ထိန်းချုပ်ထားတဲ့ ကျောက်မဲ၊ မန်တုံ၊ မိုးကုတ်နဲ့ မိုင်းငေါ့ စတဲ့နေရာတွေကို လေကြောင်းနဲ့ ဗုံးကြဲတိုက်ခိုက်တာတွေ ပြုလုပ်နေပြီး အရပ်သား သေဆုံးမှုတွေလည်း ဆက်ရှိနေပါတယ်။
မေလ ၁၈ ရက်မှာလည်း ရှမ်းမြောက် နောင်ချိုမြို့နယ် အုမ္မတီးကျေးရွာမှာ စစ်ကောင်စီတပ်က စနိုက်ဘာနဲ့ ပစ်ခတ်ခဲ့လို့ စစ်ရှောင် အမျိုးသားတစ်ဦး သေဆုံးခဲ့ပါတယ်။
စစ်ကောင်စီတပ်ဟာ ၎င်းတို့ လက်လွတ်ထားရတဲ့ နောင်ချိုမြို့ကို ပြန်ရဖို့ ပြီးခဲ့တဲ့ ဖေဖော်ဝါရီလကစပြီး တောင်းခမ်းနဲ့ အုမ္မတီးဘက်ကနေ ထိုးစစ်ဆင်တိုက်ခိုက်နေပြီး တအာင်းတပ်ဘက်ကလည်း ၎င်းတို့ထိန်းချုပ်ထားတဲ့ နေရာတချို့ လက်လွတ်ခဲ့ရတာတွေ ရှိခဲ့ပါတယ်။
“ဒီနောက်ပိုင်းက စစ်ကောင်စီဘက်က ထိုးစစ်လုပ်ပြီး ပြန်သိမ်းနိုင်တာတော့ မရှိသေးဘူး။ အခု စစ်ကောင်စီစစ်ကြောင်းက ယာပြင်ရွာမှာဘဲ ရှိသေးတယ်” လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဘက်ကတော့ နောင်ချိုတိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးဘဲ စစ်ကောင်စီထောက်ခံတဲ့ တယ်လီဂရမ်ချယ်နယ်တွေမှာတော့ တောင်းခမ်းမှာ TNLA တပ်စခန်းတွေကို သိမ်းပိုက်နိုင်ခဲ့ကြောင်း မကြာခဏ ဝါဒဖြန့် ရေးသားနေကြပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
